Avatangiisit pinngortitarlu pillugit immikkuullarissumik suliaqartumik nalunngisaqarpit?

Taava imaassinnaavoq taanna ukioq manna Namminersorlutik Oqartussat Avatangiisinik Pinngortitamillu Mianerinninneq pillugu Nersornaataanik nersornaaserneqartoq. Ukioq manna inuit, kattuffiit suliffeqarfiilluunniit eqqakkanik katersinermik imaluunniit eqqagassaqarnaveersaartitsinermik immikkuullarissumik suliniuteqartut nersornaaserneqassapput.

Naalakkersuisut Siulittaasuat Kim Kielseni ima oqarpoq: 

”Nunatsinni pinngortitap avatangiisittalu saligaatsuutinnissaat pingaartippara, ukiorlu manna inuit, kattuffiit suliffeqarfiilluunniit eqqakkanik katersinermik imaluunniit eqqagassaqarnaveersaartitsinermik immikkuullarissumik suliniuteqartut nersornaaserneqarnissaat Naalakkersuisut kissaatigaat”.

Asimi eqqakkanik katersiuartartumik imaluunniit meeqqanut inuusuttunullu oqaaqqissaarisartumik nalunngisaqarpit? Imaluunniit suliffeqarfimmik silami saligaatsuutitsinissamik eqqakkanillu katersuinissamut allanut maligassiuilluartumik nalunngisaqarpit?

Avatangiisinik Pinngortitamillu Mianerinninneq pillugu Nersornaaserneqarsinnaasumik inummik, suliffeqarfimmik kattuffimmilluunniit siunnersuuteqarsinnaavutit. Nersornaat 50.000 kr-inik aningaasartaqarpoq, inummut ataatsimut arlalinnulluunniit agguataarneqarsinnaalluni.

Nersornaasigassaqqissumik siunnersuutissaqaruit ima iliussaatit
Ukioq manna Avatangiisinik Pinngortitamillu Mianerinninneq pillugu nersornaammut piukkussaqaruit ulloq septembarip 30-at nallertinnagu uunga nassiutissavat, pan@nanoq.gl imaluunniit uunga Pinngortitamut Avatangiisinullu Naalakkersuisoqarfik, Postboks 1614, 3900 Nuuk.

Siunnersuutit naatsumik tunngavilersugaassaaq, siunnersuummik nassiussisup attaviginissaanut paasissutissat kiisalu inuit, suliffeqarfiit kattuffiilluunniit siunnersuutigineqartut attaviginissaannut paasissutissat ilanngunneqarsimassallutik.

Nunat tamalaat piujuartitsinermik tunngavilimmik atuinermik tunisassiornermillu anguniagaqarnerannut ukioq manna qulequtarineqartoq attuumassuteqarpoq, taamatuttaaq Nunat Avannarliit Avatangiisinut Nersornaataannut qulequtarineqartumut eqqagassartaqanngitsumik aaqqiissutinut attuumassuteqarluni.


Paasisaqarnerorusukkuit AC-fuldmægtigi Naja Holm attavigiuk, uunga sianerlutit 346718 imaluunniit uunga emailerlutit nhlm@nanoq.gl.