Imaatigut angallannermi isumannaallisaanerup annertunerulernissaa

Imaatigut aqqutit kalaallit inuiaqatigiit ataqatigiinnerinut tunngaviupput. Inuiaqatigiit kalaallit ingerlasinnaassappata imaatigut angallannissat pisariaqarput, aammalu kalaallit imartaanni imaatigut angalasunut tamanut imaatigut angallannermi isumannaallisaasoqarnissaata salliutinneqarnissaa pingaaruteqarluinnartuuvoq. Taamaattumik Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisup aamma Nukissiuuteqarnermut, Pilersuinermut Silallu Pissusianut Ministerip oqaatigivaat, kalaallit danskillu oqartussaasuisa akornanni suleqatigiilluarneranni pioreersumi imaatigut angallannermi isumannaallisaanerup salliutinneqarnissaa pisariaqartinneqartoq.

Kalaallit Nunaanni imaatigut angallannermi isumannaallisaanermut immap assingi nutartikkat pissarsiarineqarsinnaasullu, aammalu imarsiortunut ajunaalernermi, nukingiussaqarnermi isumannaallisaanermilu raadiu pingaarutilittut tunngaviupput. Naalakkersuisoq Ministerilu ullumi ataatsimeeqatigiipput, tassanilu Kalaallit Nunaanni immap assinginik suliaqarneq oqallisigaat, maannalu uppernartumik isumaqatigiissusiorput, immap assiliornermut pilersaarummik nutaamik sulianillu kalaallit attaveqaataannut iluaqutaasussanik kinguneqartussamik. Suliaq ilungersuullugu tigugitsik, taamaattumillu suliassanik, Kalaallit Nunaanni imarsiornermi ineriartortitsinermik nukittunerulersitseqataasussanik aallartitsisoqassasoq illuatungeriinnit erseqqissaatigineqarpoq.

Tamatuma saniatigut Naalakkersuisup Ministerillu oqaatigaat, Tele-Post aamma Nukissiuuteqarnermut Aqutsisoqarfik isumaqatigiissummik ukiuni qulini atuuttussamik, Kalaallit Nunaanni imarsiortunut ajunaalernermi, nukingiussaqarnermi isumannaallisaanermilu raadiu attatiinnarniarlugu ingerlanneqarnissaanut aningaasaliiffigineqarnissaanullu sinaakkutissanik siunissaq ungasinnerusoq eqqarsaatigalugu attanneqarsinnaasunillu qulakkeerisussamik angusaqalernerat naammagisimaarlugu. Isumaqatigiissut kiffartuussinerup isumannaatsumik ingerlaannarnissaanut tapertaasussaq, aammalu Kalaallit Nunaanni najugaqavissunnut suliffeqarfinnik pigisaqaannarnissamut qulakkeerisussaq. Ministerip Naalakkersuisullu suleqatigiinnerup pilersitsiviulluartup ingerlaannarnissaa qilanaaraat.

- Immap assiliorneq pillugu isumaqatigiissuteqarnerput nuannaarutigaara. Naalakkersuisorlu marluulluta periarfissaq iluatsillugu qanoq iliorluta imaani isumannaallisaaneq annertusitissinnaanerlugu oqallisigaarput, tassanilu aamma Kalaallit Nunaanni ajunaalernermi, nukingiussaqarnermi isumannaallisaanermilu raadiu, aammattaaq uannut suliassaqarfittut pingaaruteqartoq oqallisigaarput, Nukissiuuteqarnermut, Pilersuinermut Silallu Pissusianut Ministeri Lars Chr. Lilleholt oqarpoq.

- Immap assiliornermi ajornartorsiutit, taamatullu ajunaalernermi, nukingiussaqarnermi isumannaallisaanermilu raadiu pillugu nalornineq peqqutaallutik pissutsit ajuusaarnarluinnartut atorpagut, tamannalu Naalakkersuisut naammaginngilaat. Maanna Ministerip naapereernerani suliat aalajangersarneqarsimanerat upperinerulerpara. Taamaattumik Kalaallit Nunaanni imaatigut angallannermi isumannaallisaanerup ingerlaavartumik pitsannguuteqartarnissaanut qilanaarpunga, Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoq oqarpoq.

Lars Chr. Lilleholt

Nukissiuuteqarnermut, Pilersuinermut

Silallu Pissusianut Ministeri                          
Erik Jensen

Kommuninut, Nunaqarfinnut, Isorliunerusunut,

Attaveqaqatigiinnermut Ineqarnermullu Naalakkersuisoq  

Paasisaqarnerorusuttut attavigisinnaavaat immikkoortortami pisortaq Andreas Østbirk, Attaveqaqatigiinnermut Immikkoortortaqarfik, e-mail aost@nanoq.gl imaluunniit oqarasuaat +299 34 50 00.