Immap assiliornerup kinguaattoornerat

Suliamut tunngatillugu piffissamut pilersaarummik tutsuiginartumik suliaqartoqarnissaa suliallu sapinngisamik ingerlanneqalertornissaanik qulakkeerinnittoqarnissaa Naalakkersuisut kissaatigaat

Immap assingi 2018-imi naammassineqartussaagaluarput. Tassalu 2018-ip naanerani Kalaallit Nunaata kitaata kujataani, Kalaallit Nunaanni umiarsuit amerlanersaasa angalaffigisaanni immap assingi nutaat, nutartikkat digitalinngorsarneqarsimasullu piareersimasussaagaluarput. Immap assingi nutaat immap assinginut, ukiorpassuarni atorneqarsimasunut, aammalu Kalaallit Nunaanni sinerissap imartallu sinnerini suli atorneqartussatut pilersaarutigineqartunut taartaasussaapput. “Immap assinginut suliami” killiffik eqqortoq Geodatastyrelsip nittartagaani takuneqarsinnaavoq.

2016-ip naanerani Kalaallit Nunaata kitaata kujataani immap assiliassanut, isumaqatigiissummut ilaatinneqartunut, kisiannili suli suliarineqanngitsunut tamanut sinaakkutissanik siunnersuusiortoqarpoq, aammalu immap assingisa sinnerinik suliaqarnermi tulleriiaarinissamut pilersaarusiortoqarluni. 2020-imi suleqatigiit suliaqartussat naammalernissaat naatsorsuutigineqartoq Geodatastyrelsimit ilisimatitsissutigineqarpoq, tamatumalu kingorna taakku immap assinginik suliaqarneq sukkanerulersissinnaavaat. Qaqugu naammassineqarsinnaanissaat naatsorsuutigineqarnersoq Geodatastyrelsi ulluliisinnaanngilaq.

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoq Erik Jensen oqarpoq:

”Suliassaq 2009-mi isumaqatigiissut naapertorlugu naammassineqarsinnaanngimmat uggornartorujussuuvoq. Taamatut kinguaattoortoqarnera soorunami naammaginanngilaq. Taamaattumik Nukissiuuteqarnermut, Silap Pissusianut Pilersuinermullu Ministerip Lars Christian Lilleholtip qaammammi matumani kingusinnerusukkut ataatsimeeqatiginissaa qilanaaraara, tassanilu immap assiliorneq, tassungalu ilanngullugu qulequttat allat, Kalaallit Nunaata eqqaani imaatigut angalanerup isumannaassusissaanut isumaqartut oqaluuserisassatsini pingaarnerit ilagissavaat. Ministerip immap assiliornerup annikinnerpaamik kinguaattoorfiusumik naammassineqarnissaanut periarfissat pillugit nassuiaateqarnissaanut qilanaarpunga.

Tamatuma saniatigut danskit ministeriata uangalu immap assinginik nutaanik utaqqinitsinni allatut iliorluta Kalaallit Nunaanni imaatigut angallannerup isumannaatsuunissaanut immikkut ittumik iliuuseqarsinnaanerluta oqallinnissarput naatsorsuutigaara.

Siusinnerusukkut politikkikkut oqalliffiusumik ataatsimiittoqartarnerani danskit naalakkersuisuinit ilisimatitsissutigineqarpoq, Aqutsisoqarfiup illoqarfiit pingaarnersaanniit Aalborgimut nuunneqarnissaanik danskit naalakkersuisuisa aalajangiineranni Geodatastyrelsimi sulisut ikittuaraannaat nuunniarlutik aalajangersimanerat immap assiliornerup kinguaattoorneranut peqqutaasoq. Suliami tassani suliffinnik taamatut nuussinerup kingunerisaanik ikaarsaarnermi ajornartorsiuteqartoqartussaasoq siumut ilisimaneqareersinnaammat, danskit naalakkersuisuisa Kalaallit Nunaanni immap assinginik nutaanik suliaqarnerup kipineqarani ingerlatiinnarneqarnissaa danskit naalakkersuisuisa qulakkeersimassagaluaraat kissaatigisinnaagaluarpara.

Tamatumunnga taarsiullugu maanna suliap ukiunik arlalinnik kinguaattoornera akuerisariaqalerparput. Taamaattumik immap assiliornerup sulianut allanut, Kalaallit Nunaata sineriaani immakkut angallannerup isumannaassusianik siuarsaaffiusinnaasunut ilagitillugu tatiginartumik, piffissamut pilersaarummik iluarsiiffiusumik pitsaanerpaamillu siumukarnissaa Naalakkersuisunut pingaaruteqarpoq. Neriuppunga, ministerip qaammatip ingerlanerani kingusinnerusukkut tamaanga Kalaallit Nunaannut tikeraarpatigut isumaqatigiissuteqarsinnaassalluta.”

Matuma siuliani allassimasut pillugit apeqqutissaqartoqaruni, tamanna pillugu immikkoortortami pisortaq Embla Kristjánsdóttir – emki@nanoq.gl – saaffigeqquneqarpoq.