Vittus Maaru Mikaelsinimik eqqaaniut

Naalakkersuisut aliatsaatigisaminnik tusartinneqarput borgmesteriusimasoq, Ammassallip Kommuniani Kommuneqarfik Sermersuumilu kommunalbestyrelsemi ilaasortaasimasoq Inatsisartunilu ilaasortaasimasoq Vittus Maaru Mikaelsen sivisuumik napparsimareerluni toqusimasoq. Taamannak tusarlerneqarnitsinni nulia, qitornai pingasut ernutaalu arfineq marluk misiginneqatiginneqataanitsinnik apuussivigerusuppakka.

Inuiaqatigiinnik soqutigisaqartuunini aallaavigalugu Namminersornerullutik Oqartussaqalernitsinniilli Vittus Maaru Mikaelsen naalakkersuinermik suliaqarsimavoq, siullermik Ammassallip Kommuniani kingornalu Kommuneqarfik Sermersuumi arlaleriarluni kommunalbestyrelsemut ilaasortaasarsimanermigut, kiisalu aamma Inatsisartuni ilaasortaasarsimanermigut. 2009-mi kommunerujussuanngortitsinerit tungaannut taamaalilluni Ammassallip Kommuniani kingulliulluni borgmesteriusimavoq.

Vittus Maaru Mikaelsen Tasiilami najugaqartunit ingammik maqaasineqassaaq Tasiilami nunaqarfiinilu pissutsinik qasusuilluni suliniarsimanera pillugu. Vittus Maaru Mikaelsenip aamma sanngiinnerusut atugaasa pitsanngorsarneqarnissaannik nuna tamakkerlugu sullillisimanera aamma maqaasineqaatigissavaa.

Vittus Maaru Mikaelsenip eqqaaneqarnera ataqqinartuuli.

Naalakkersuisut Siulittaasuat Kim Kielsen