Kapisilinniarneq aggustip 15-ianni aallartissaaq

Kapisilinniarneq marlunngornermi aggustip 15-ianni aallartissaaq oktobarip 31-anni unitsinneqassalluni, imaluunniit pisassiissutigineqartut nunguppata.

Inuussutissarsiutigalugu sunngiffimmilu aalisartut ukioq manna kapisilittassaat 45 tonsiupput.

Inuussutissarsiutigalugu aalisartut  namminneq pissaminnik aalisarsinnaapput aamma kalaalimineerniarfinnut, suliffeqarfinnut akunnittarfinnullu tuniniaasinnaallutik. Inuussutissarsiutigalugu aalisartut aalisarsinnaanermut akuersissuteqassapput. Sunngiffimmi aalisartut namminneq pissaminnik aalisarsinnaapput. Kapisilittarineqartut tunitsivinnut tunineqassanngillat.

Siunissami kapisilinniartuarnissaq piumallugu pingaaruteqarluinnarpoq kapisilittarineqartut tamarluinnaasa nalunaarutigineqartassammata. Taamaattumik matumuuna tamanna erseqqissaassutigineqarpoq.

Inuussutissarsiutigalugu sunngiffimmilu aalisartut pisatik pinngitsooratik nalunaarutigisussaavaat. Qassutinik takusaareersimasoqartillugu pisat tamaasa nalunaarutigineqartassapput, kapisilimmilluunniit pisaqartoqarsimanngikkaluartoq aamma nalunaarutiginnittoqartassalluni. Kalaallit Nunaanni Aalisarsinnaanermut Akuersissutinik Nakkutilliisoqarfimmut, KANUAANA-mut  mailikkut allalluni sianerluniluunniit nalunaartoqartassaaq.

Attavigineqarsinnaavoq: Aalisarnermut Piniarnermullu Naalakkersuisoqarfimmi AC-fuldmægtig, John  Biilmann. Mail: johb@nanoq.gl