Nuugaatsiamiit Illorsuarniillu innuttaasunik inisseeqqinnissamut aningaasaliissutit

Kommuninut, Nunaqarfinnut, Isorliunerusunut, Attaveqaqatigiinnermullu Naalakkersuisoq Erik Jensen ilisimatitsivoq, Naalakkersuisut aamma Inatsisartut Aningaasaqarnermut Ataatsimiititaliaat 70 mio. koruuninik, Nuugaatsiami Illorsuarnilu pinngortitami ajunaarnersuarmit eqqugaasut inisseqqinneqarnissaannut aningaasartuutinut matussutissanik immikkoortitsisut.

Aningaasat inissianik ataavartussanik katiteriaannarnik sanaartornermut, sumiiffimmi inissianik namminerisamik pigineqartunik pisiniarnermut aammalu inissianik pioreersunik, Namminersorlutik Oqartussanit imaluunniit Qaasuitsup Kommunianit pigineqartunik iluarsaassinermut atorneqassapput. Inissianik ataavartussanik sanaartorneq Uummannami nunaqarfiinilu, Upernavimmi, Aasianni, Qeqertarsuarni imaluunniit Qasigiannguiani pisinnaavoq, tassalu maannarpiaq nunaqarfiit inuerutsinneqarsimasut pineqanngillat. Inissiat ataavartussat inissisimaffissaannut inoqutigiit tamarmik kissaataat pisariaqartitaallu aallaavigineqassapput. Qaasuitsup Kommuniata maannarpiaq innuttaasunut eqqugaasunut paasiniaanerit ingerlappai.

Aningaasat Namminersorlutik Oqartussat sanaartugaannit, atuinikinneruffiullutik naammassineqartunit nuunneqassapput, tassanilu aamma kommunit aningaasanik, 2016-imi aamma 2017-imi Nunaqarfinnut Isorliunerusunullu Inissialiortiternermut Pilersaarummut immikkoortinneqartunik atorneqanngitsunik tapiissuteqassapput.

Kiisalu aalajangiunneqarpoq, innuttaasut illunik sanaqataaffiusunik namminerlu illulianik, suli Namminersorlutik Oqartussanut akiitsoqarfiusunik pigisaqartut akiitsui 0 koruuninut appartinneqassasut. Taamaalilluni innuttaasut taakku inuunermik nutaamik aallartitsisinnaalissapput.

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoq Erik Jensen oqarpoq:

”Nuannaarutigeqaara Naalakkersuisut Inatsisartut kiisalu kommunit qanimut suleqatigiilluarnerisigut, innuttaasut Nuugatsiami Illorsuarnilu tassaarsuaqarnerani eqqugaasimasut toqqissisimasumik inuuneqalernissaannut namminnerlu illoqaqqilernissaannut, piaartumik sanaartornissaannut aningaasaliinissat piviusunngormata”.

 

Matuma siuliani allassimasut pillugit apeqqutissaqartoqaruni, tamanna pillugu immikkoortortami pisortaq Embla Kristjánsdóttir – emki@nanoq.gl – saaffigineqarsinnaavoq.