Imigassaq pillugu inatsimmik innuttaasunik ataatsimiisitsineq

Maanna Peqqissutsimut Naalakkersuisoq Agathe Fontain imigassaq pillugu inatsisissatut Inatsisartunut siunnersuutissaq pillugu Sisimiuni, Sarfannguani Itillimilu innuttaasunik ataatsimiisitsisimalereerpoq.

Innuttaasunik ataatsimiisitsinermi siunnersuut pillugu paasisaqarnerorusuttut inatsisissatullu siunnersuut pillugu assigiinngitsunik isummersorusuttut peqataapput.

Oqariartuutit marlussuit sumiiffinni pingasuni innuttaasunit anngunneqarput. Siulleq tassaavoq inuiaqatigiit akornanni annertuumik atornerluisoqarneranik isiginnaartuuinnarusukkunnaartut, taamaattumik imigassaq aalakoornartortalik pillugu inatsimmi sukaterisoqarnissaa taperserneqarlugu.

Oqariartuutip aappaa tassaavoq kikkut tamarmik inuiaqatigiinni akisussaaqataasut, aamma pisiniarfiit imerniartarfiillu imigassamik tuniniaasartut. Ullut tamaasa inuusuttut 18-it inorlugit ukiullit imigassamik sikaratsinillu pisiniarfinni tuniniaasut takusarpaat, aamma pisiniarfinni imerniartarfinnilu inunnut malunnartorsuarmik aalakoortunut imigassamik tuniniaasoqartarpoq. Innuttaasut oqarput pisiniarfiit imerniartarfiillu aningaasarsiorniaannarlutik atornerluinermik tapersiinatik pitsaaliuinermi iliuuseqaqataasariaqartut.

Unnummut Agathe Fontain Maniitsumi oqaluffitoqqami nal. 19.00 innuttaasunik ataatsimiisitsissaaq. Aqagu Nuummut aallaqqikkuni Napasoq Atammillu aqqusaassavai.

Itillimi ataatsimiititsineq

Paasisaqarnerujumallutit Naalakkersuisup allattaa Nauja mobilikkut attavigisinnaavat +299 58 26 54.