Avannaarsuani aatsitassarsiorfissatut suliniuteqarfiusumut tikeraarneq

Aatsitassanut Ikummatissanullu Naalakkersuisup nunatta Avannaarsuani aatsitassarsiorfissatut suliniuteqarfiusoq tikeraarpaa

Saamillermit: Jonathan Downes, Ironbarkimi pisortaaneq; Múte B. Egede, Aatsitassanut Naalakkersuisoq, Mr. Qin Junman, Vicepresident for China Nonferrous. 

 

Aatsitassanut Ikummatissanullu Naalakkersuisoq Múte B. Egede, aggustip pingajuani sisamaanilu Citronen Fjordimi Ironbarkip zinkimik aqerlumillu qalluiffissaanut Tarsarnermut tikeraarpoq.

Ironbark A/S-ip sinnissaasa suleqatitik China Nonfferousimeersut (China Nonferrous Metal Industry’s Foreign Engineering and Construction Co., Ltd) peqatigalugit piffimmik alakkarterineranni tikeraarneq ingerlanneqarpoq. China Nonferrousip ilaatigut Ironbark Kinami aningaasanik niuerfinni aningaasaliisussarsiornissamik ikiussavaa.

Aatsitassanut Ikummatissanullu Naalakkersuisoq Múte B. Egede oqarpoq:

”Suliffeqarfiup aatsitassasiorfimmik aallartitsiniarneranut atatillugu akuersissutip pappiaqqatigut suliarinera suleriaatsit ilagaat. Namminerli avatangiiseq takullugu piffimmi annertuumik aatsitassarsiortoqarneratigut inoqarfimmik pilersitsinissaq takorloorlugu allarluinnaavoq. Unammillernartut annertuut tikikkaluttuarneqarput, naleqqulluartunilli suleqateqarnikkut pilersaarutit piviusunngortinneqarnissaat iluatsissaqqaarpoq”.

Aatsitassarsiorluni piiaanissamut akuersissut 2016-imi decembarip qaammataani tunniunneqarpoq. Ironbark A/S maanna suliniummut aningaasaliisussarsiuleruttorpoq.

Citronen Fjordimi zinkimik aqerlumillu qalluiffimmik tunisassiornermillu aallartitsinissap piffissamik pilersaarutaa pillugu Aatsitassanut Naalakkersuisoq Múte B. Egede oqarpoq:

”Aatsitassarsiornermik suliniutit allat assigalugit aatsitassarsiorfimmik aallartitsinermi aningaasaliivigineqarnissamik pisariaqartinneqartut pissarsiarinissaannik periarfissaq apeqqutaavoq. Ironbarkip piiaanissamut akuersissut pissarsiarereerpaa, maannalu pilersaarut aallartikkumallugu aningaasaliisussarsiorneq ingerlanneqaleruttorpoq. Citronen Fjordimi aatsitassarsiornerup aallartinnissaanut ukiut marluk sisamallu akornanni ingerlaqqaarnissaat piviusorsiortutut isigaara. Tamatumani zinkip nunarsuarmi akiisa aalaakkaasumik qaffasiinnarnissaat apeqqutaassaaq.”

Citronen Fjordimi Ironbarkip tammaarsimaffianit isikkivik, august 2017.

Paasissutissat erseqqinnerusut:

Naalakkersuisup allattaa Jane P. Lantz oqarasuaat 346839/ 597909, imaluunniit e-mail: japl@nanoq.gl

Aatsitassanut Ikummatissanullu pisoqartaqarfimmi pisortaq Jørgen T. Hammeken-Holm, mobil 55 24 66, imaluunniit e-mail: joeh@nanoq.gl