Thulemi radarimik suliniut pillugu misissuisitsinermik aallartitsivoq

Thulemi radarimik suliniut pillugu Namminiilivinnermut, Nunanut Allanut Nunalerinermullu Naalakkersuisoq Suka K. Frederiksen misissuisitsinermik aallartitsivoq

Thulemi radarimik suliniut pillugu Naalakkersuisoq Suka K. Frederiksen misissuisitsinermik aallartitsivoq, tassuuna suliap ingerlanera tamaat naliliivigineqassammat, ilutigaluguttaaq nunanut allanut ministeriaqarfimmik oqaloqateqarneq ingerlanneqarpoq.

Illersornissamut isumaqatigiissut aallaavigalugu USA-p Thule Air Base-mi attavii pillugit ukiumoortumik nalunaarusiortoqartartussaavoq. ”Pituffimmi radarimut atortorissaarutit nutarternissaannut suliniut pillugu paasissutissanik nalunaarummillu allaffissornikkut nalunaartoqarsimasoq ilisimatinneqarpunga.” Naalakkersuisoq Suka K. Frederiksen oqarpoq (Sakkutooqarfimmi Amerikamiut suliniutaat pillugu nalunaarusiani 2015-immersumi 2016-imeersumilu).

Allaffeqarfimmit ilisimatitsissutigineqarpoq qulequtaq tamanna siusinnerusukkut Naalakkersuisunit oqaluuserineqarsimanngitsoq. Tamatumunnga Pituffimmi kiffartuussinissamik isumaqatigiissut pillugu USA-mik isumaqatiginninniarneq maanna ingerlasoq eqqarsaatigineqarsimammat, isumaqatiginninniarnerillu naammassitinnagit ilaatigut Permanent Committeemi ataatsimiinnissaq tulluartinneqarsimanngimmat. Nutaamik kiffartuussinissamut isumaqatigiissutissaq ukkatarineqarpoq, tassuuna qulakkeerusunneqarmat Kalaallit Nunaata inuiaqatigiillu Amerikamiut nunatsinniinnerannut annertunerpaamik iluaqutigieqarnissat.

Naalakkersuisoq Suka K. Frederiksen erseqqissaavoq: ”Nunanut allanut ministeriaqarfimmut saaffiginnissuteqareerpugut, ataavartumillu attaveqatigiinneq ingerlalluni, ilaatigut paarerusupparput radarimik nutarterineq 2016-mi ingerlanneqartoq Igalikumi isumaqatigiissummut allannguuteqarnertut taaneqarluni oqaloqatigiissutigineqaqqaarluni pisussaanersoq. Taamaattumillu radarimut ikkussuineq pillugu saaffiginnissummik tigusaqartoqarsimanersoq il.il. piffissami aggersumi akineqassalluta.

Tamanna pereerpat nalilerneqassaaq ingerlaaseq ingerlariaqqinnissarlu pillugu Naalakkersuisuni Inatsisartullu Nunanut Allanut Sillimaniarnermullu ataatsimiititaliaani qanoq ingerlariaqqissanersoq. Pingaaruteqarpoq aaliangersaanerup pitinnagit paasissutissat tamakkiisut tigusimanissaat Pingaaruteqarpoq nunatsinnut tunngassuteqartut soorunami PINNGITSOORATIK naalakkersuinikkut oqartussaasut suleriaasai malillugit ingerlanneqarnissai.”

Taamaattumik suliat nunanut allanut, sillimaniarnermut isumannaallisaanermullu tunngasut politikkikkut apeqqutit Naalakkersuisunit annertuumik pingaartinneqarlutik salliutinneqarput.

 

Annertunerusumik paasisaqarusukkaanni saaffissaavoq Naalakkersusisoqarfimmi pisortaaneq pisotaagallartoq, e-mail: jsis@nanoq.gl imaluunniit oqarasuaat: +299 556 772