Sara Olsvig: Isumaginninnermut suliassaqarfiup pitsaanerulersinnissaa ataatsimoorluta qulakkiissavarput

Isumaginninnermut Naalakkersuisoq Sara Olsvig Naalakkersuisunut ilaasortanik allanik, nunatsinni borgmesterinik kiisalu ikaarsaariarnermi ataatsimiititaliat siulittaasuinik marluusunik isumaginninnermik suliassaqarfimmi suleqatigiinnissaq pillugu piffissami kingullermi ataatsimeeqateqartarpoq. Suliassaqarfik kommunit tunngaviusumik akisussaaffigaat, najukkani isumaginninnermik ingerlatsiviit pissusissamissut ingerlanissaannut kommunalbestyrelsit qullersatut akisussaallutik. Meeqqanilli ilaqutariinnillu aarlerinartorsiortunik suliassaqarfimmi ingerlatsinerup pitsaassutsikkut malunnaatilimmik qaffanneqarnissaanut illuatungeriit tamarmik akisussaaqataapput.

”Ataatsimiinnerit suleqatigeerusussuseqarluarluni ingerlasarput. Isumaginninnermik suliassaqarfiup pitsanngorsarnissaanut atatillugu politikkikkut pingaaruteqarluinnartumik suliassaqarpugut. Akisussaaffik tamanna tamattaalluta tigussavarput”, Sara Olsvig oqarpoq.

Meeqqat tapersersorneqarnissaannut inatsimmik Inatsisartut akuersissuteqarput, tassuunakkut meeqqat taakkualu ilaqutaasa aarlerinartorsiortut ikiornissaannut kommunit pitsaanerusunik sakkussaqalersinneqarput. Tamatuma saniatigut Isumaginninnermut Aqutsisoqarfimmik, kommunini isumaginninnermik suliassaqarfiup suleqatigiinneq aqqutigalugu ilorraap tungaanut ineriartulernissaanik siuarsaanermik pingaarnertut suliassaqartumik pilersitsinissamut Naalakkersuisut aningaasat milliunilikkaat aningaasanut inatsimmi immikkoortippaat.

”Suliassaqarfimmi suliniutitta qanorlu aaqqissuussaanitta nutaamik eqqarsaatigeqqinnissaannut meeqqat tapersersorneqarnissaannut inatsisip tamatta unammiligassaqartissavaatigut. Kommunit akisussaaffimminnik ilisimaarinninnerannik borgmesterinik ataatsimeeqateqartarninni erseqqissumik oqarfigineqartarnera ilumoorlunga assut nuannaarutigaara. Suliassaqarfik annertuumik tunniusimaffigineqarpoq, kommunillu suleqatigiinnissamut allannguinissamullu sassartaarnerat malugisinnaagakku nuannaarutigaara”, Sara Olsvig oqarpoq.

Aasaanerani ataatsimiittarnerit qulequtaqarput ”Isumaginninnermik suliassaqarfiup nukittorsarneranut ataatsimoorluni suliniutit”. Kommunini ataasiakkaani Namminersorlutik Oqartussat ingerlataat, Meeqqat tapersersorneqarnissaannut inatsisip atuutilersinneqarnera, Isumaginninnermut Aqutsisoqarfiup suliassai kiisalu kommunit aamma Isumaginninnermut Aqutsisoqarfiup qanoq ilillutik nunaqarfinni sullissinermik nukittorsaasinnaanerat, meeqqallu najukkaminni periarfissaat pisinnaatitaaffiilu nukittorsaavigalugit, ataatsimiinnerni ilaatigut oqallisigineqarput.

Paasissutissanik annertunerusunik piniaruit attaveqarfigiuk:

Ministerip allattaa, Nina Jul Larsen

Oqarasuaat: +299 53 93 71

E-mail: nina@nanoq.gl