Pituffiup Avanersuarmiunut akunniffissatut ammarneqarnissaanut tunngasoq

KNAPK-miit allakkanut akissut Namminiilivinnermut, Nunanut Allanut Nunalerinermullu Naalakkersuisumit Suka K. Frederiksen-imiit

Naalakkersuisut allakkanik ammasunik KNAPK-miit tigusaqarput Avanersuarmiunut Pituffiup akunniffissatut ammarneqarnissaa pillugu.

Naalakkersuisut sinnerlugit ilisimatitsissutigineqassaaq sakkutooqarfimmut isernissamut Nalunaarut nr. 138, 8. februar 2010-meersoq Kalaallit Nunaata ilaani iserfiusinnaasut angallaffiusinnaasullu pillugit nalunaarut malinneqarmat. Nalunaarut malillugu inuit, inuit allattorsimaffianni Kalaallit Nunaata avannaani allorniusaq avannamut sanimukaartumi 75 grader-imi, allorniusarlu tukimukaartoq 63 grader-ip iluanni angerlarsimaffeqarunik, sakkutooqarfimmut isersinnaatitaapput, aallarlutillu aamma aqqusaarsinnaatitaallutik. Naatsumik oqaatigalugu:

Qallunaat illersornissamut forbindelsesofficeri nalunaarutigaa Pituffimmi sakkutooqarfimmi ingerlariaaseq malillugu, nunaqartut umiatsiaminnik orsiinissamut periarfissaqarmata sakkutooqarfimmi orsussaq (benzin) naammattoq pigineqarpat. Orsiisarfik US Air Force-mit pigineqaranilu aqunneqanngilaq, piginneqatigiiffimmilli sakkutooqarfimmik aserfallatsaaliillunilu aqutsisumik pigineqarluni. Piginneqatigiiffiup sullissinermini orsussamik tuniniaanermini nalilersuisarpoq orsussamik peqqumaatigisaq naammattoq pigineqarnersoq naliliinermilu tamanna aallaavigisarlugu.

Amerikkamiut sakkutooqarfiata aqutsisuata forbindelsesofficerilu isumaqatigiissutaat malillugu nioqqutissanik pisiniarsinnaatitaanerit ingerlanneqartarput. Nunaqavissut nerisassanik akikillisani ”Degli”-nik pisiniarsinnaapput, piginneqatigiiffik sakkutooqarfimmi aserfallatsaaliiutigaluni aqutsisunit ingerlanneqartumut, ”Dundas Budget Restaurant”-imi, taamatullu Sakkutooqarfimmi amerikamiut pisiniarfianni ”BX”-imi annikitsumik pisiniarsinnaallutik.

Tamanna tunngavigalugu ukiorpassuarnilu isumaqatigiissutit atuuttut malillugit, innuttaasut piniartullu piffinni pineqartuni, KNAPK-mi ilaasortat ilanngullugit, Pituffimmut aqqusaarsinnaatitaapput. Tamanna Nunanut Allanut Ministeriaqarfimmit uppernarsarneqarpoq.