Tuttunniarnissamut aamma umimmanniarnissamut piffissaliussat pisassiissutillu - Ukiaanera 2017

 

Matumuuna ukiaanerani 2017-imi piffissaliussat piniarfiusussat, tuttutassiissutit kiisalu umimmattassiissutit Naalakkersuisumit aalajangerneqartut nalunaarutigineqarput. Ukiuni arlalissuanngortuni tuttunik umimmannillu kisitsisoqartannginnera pillugu Pinngortitaleriffimmiit ukioq manna aamma siunnersuisoqarnikuunngilaq taamaattumillu APN-imiit piniarfinni ataasiakkaani mianersorneq tunngavigalugu ingerlatsisoqarluni. Ivittuuni Juuni-mi 2017-imi umimmannik minnerpaaffiliinikkut kisitsineq tunngavigalugu Ivittuuni umimmattassiissutit allannguuteqarput. Ukiukkut 2018-imi pisassat ukiaru immikkut tusarniutigineqassapput.


Tuttut
1. Piniarfinnut tamanut tunngasoq: Inuussutissarsiutigalugu tuttunniarneq 1. aggusti-mi aallartissaaq 15. oktobari ilanngullugu ingerlassalluni.
2. Piniarfinnut tamanut tunngasoq: Sunngiffimmi tuttunniarneq 1. aggustimi aallartissaaq 30. septembari ilanngullugu ingerlassalluni. Aqutsiveqarfimmi Nuuk-mi sunngiffimmi piniartunut ataasiakkaanut akuersissutinik marluinnarnik tuttunut tallimanut atuuttunik tunniussisoqassaaq. Piniarfik 3-mut akuersissut ataaseq aamma Piniarfik 4-mut akuersissut ataaseq.
3. Piniarfik 9 aamma 10 (Kangerluarsorujak, Nuna Prudhoe kiisalu Nuna Inglefield): Inuussutissarsiutigalugu aamma sunngiffimmi tuttunniarneq 1. aggustimi aallartissaaq 30. novembari ilanngullugu ingerlassalluni.
4. Piniarfik 11: Piniarfik 11 kujammut Kommuneqarfik Sermersuup kujammut killeqarfianut allineqarpoq – Ilanngussaq 6 takuuk.

Tunngavilersuutit: Tuttunniarnermi 2016-imi sunngiffimmi piniartunut Nuummeersunut 1.053-inut 1. maaji sioqqullugu piniarnermut allagartamik akiliinikunut piniarfimmut ataatsimut akuersissummik ataasiinnarmik tunniussisoqarpoq taamaaliornikkullu akuersissutit 1.670-it tunniunneqarlutik tassa Akia-Maniitsumut akuersissutit 783-it Ameralimmullu akuersissutit 767-it. Kisiannili taakkuninnga taamaallaat 45%-ii pisanik nalunaaruteqarnertalimmik utertinneqarlutik tamannalu pillugu tuttut piniarfinni taakkunani marlunni qanoq sakkortutigisumik piniarneqartarnerat APN-imut nalileruminaalluni. APN-ip kommunit qanimut suleqatigalugit akuersissutinik utertitsisarneq malinnaaffigivaa utertinneqartannginnerallu pillugu ataasiakkaanut akuersissutinik qinnuteqarsinnaanissamut ukiuni aggersuni kinguneqassaaq, imm. 2 takuuk. Piniarfik 11-p kujammut Kommuneqarfik Sermersuup killeqarfianut allineqarnissaa Kommune Kujallermiit aamma Arsummi Sumiiffimmi Siunnersuisoqatigiinniit taperserneqarpoq, imm. 4 takuuk.

Umimmaat
5. Aqutsiveqarfik Maniitsoq: Piniarfik 1-imi aamma Piniarfik 3-mi inuussutissarsiutigalugu sunngiffimmilu umimmanniarneq 1. aggustimi aallartissaaq 30. septembari ilanngullugu ingerlassalluni tassanilu kulavaat norraallu piniarneqaqqusaanatik.
6. Aqutsiveqarfik Sisimiut: Inuussutissarsiutigalugu aamma sunngiffimmi umimmanniarneq 1. aggustimi aallartissaaq 15. oktobari ilanngullugu ingerlassalluni umimmattassiissutillu 400-iullutik.
7. Aqutsiveqarfik Qaanaaq: Piniarfimmi Kooqqunni inuussutissarsiutigalugu sunngiffimmilu umimmanniarnissamut umimmattassiissutit 40-ruupput. Piniarfimmi Nuna Inglefield-imi inuussutissarsiutigalugu sunngiffimmilu umimmanniarnissamut umimmattassiissutit allannguuteqaratik 60-iupput kisianni umimmanniarnissamut piniarfik kujammut Nuna Prudhoe ilanngullugu allineqarluni – Ilanngussaq 5 takuuk.
8. Aqutsiveqarfik Ivittuut: Minnerpaaffiliinikkut kisitsineq nutaaq malillugu umimmattassiissutit 100-iupput taakkunanngalu 85-it inuussutissarsiutigalugu piniartunut Arsummeersunut pisassinneqarlutik 15-illu sunngiffimmi piniartunut – kulavaat 1-2-nik ukiullit 40-t aamma kulavaat 3-nik ukiullit utoqqaanerusullu 60-it.
9. Aqutsiveqarfik Sigguk: Umimmattassiissutit allannguuteqaratik 150-iupput.

Tunngavilersuutit: Qaanaap aqutsiveqarfiani Kooqqunni (Kap Atholl) 2015-imi minnerpaaffiliinikkut kisitsereernerup kingorna inuussutissarsiutigalugu aamma sunngiffimmi piniarnissamut umimmattassiissutit 40-runngorput, imm. 7 takuuk.
Nuna Inglefield-imi umimmanniarnissamut piniarfik kujammut Nuna Prudhoe ilanngulluggu allineqarpoq umimmaat amaroqarneranik peqquteqartumik kujavartertalernikuummata, imm. 7 takuuk.
Siggummi inuussutissarsiutigalugu sunngiffimmilu umimmanniarnissamut umimmattassiissutit 150-iupput piniarfimmilu minnerpaaffiliinikkut kisitsisoqaqqinn-ginnerani qaffanneqassanatik, imm. 9 takuuk.
Ivittuuni killilimmik umimmattassiisoqarmat inuussutissarsiutigalugu sunngiffimmilu piniartut aqutsiveqarfiit allaneersut inatsimmi tunngaveqartumik pisassinneqanngillat.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat tuttunik umimmannillu malersuinermi piniutigissallugilluunniit inerteqqutaammata.

Sunngiffimmi piniarnermut allagartap 1. maaji sioqqullugu akilereersimanissaa pillugu piumasaqaat atuutinneqarpoq. Taamatullu sunngiffimmi piniarnermut akuersissutit inunnut Kalaallit Nunaanni najugalittut inuit nalunaarsorsimaffiannut nalunaarne-qarsimasunut ukiunilu qaangiuttuni marlunni nalunaarsorneqareersimasunut taamaallaat tunniunneqarsinnaanerat pillugu piumasaqaat atuutinneqarluni.

Paasissutissat sukumiinerusut pillugit uunga saaffiginnittoqarsinnaavoq: Piniarnermut immikkoortortaqarfimmi pisortaagallartoq Nuka Møller Lund, Aalisarnermut Piniarnermullu Naalakkersuisoqarfik, Tlf: +299 34 53 45, Mail: numl@nanoq.gl

Ilanngussaq 1: Nunap immikkoortuini piniarnissamut piffissat pisassiissutillu.
Ilanngussaq 2: Kalaallit Nunaata kitaani tuttunut Piniarfik 1-11.
Ilanngussaq 3: Kalaallit Nunaanni umimmaqatigiit.
Ilanngussaq 4: Maniitsup aqutsiveqarfiani umimmannut Piniarfik 1 aamma 3.
Ilanngussaq 5: Umimmaqarfik Nuna Inglefield aamma Nuna Prudhoe.
Ilanngussaq 6: Tuttunut Piniarfik 11 kujammut allineqartoq.