Sisimiuni Inunnut Innarluutilinnut Sullissivik nunamut tamarmut atuuttoq atertaarpoq

Sisimiuni Inunnut Innarluutilinnut Sullissiviup nutaap nunamut tamarmut atuuttup aqqa assut nunannaarutigalugu tamanut saqqummiussinnaalerpara.

Siunnersuutitsialaat nassiunneqartut tamaasa qujassutigerusuppakka. Siunnersuuterpassuit tunuliaqutaralugit ateq, pineqartunik arlalinnik siunnersuutini tiguneqartuni erseqqissaatigineqartunik ataatsikkoortitsilluni imaqartoq toqqarparput.

Inunnut Innarluutilinnut Sullissivik Nunamut Tamarmut Atuuttoq ateqalerpoq – Pissassarfik.

Pissassarfik tassaavoq angakkut angakkussartullu – timikkut eqqarsartaatsikkullu nukissaminnik – aallerfiginiarlugu ornittagaat.

Inunnut Innarluutilinnut Sullissivik nutaaq innuttaasut, taakku ilaqutaasa kiisalu isumaginninnermik ilinniarsimasutut sulisut sungiusarfigisinnaasaattut, siunnersorneqarfigisinnaasaattut kiisalu aqqutissiuunneqarfigisinnaasaattut sullissiviussaaq, isumaqarpugullu siunertamut tamatumunnga oqaaseq Pissassarfik tulluarluinnartuusoq.

Inunnut Innarluutilinnut Sullissivik Nunamut Tamarmut Atuuttoq assigisaanik nutaamik ilisarnaatitaarpoq. Ilisarnaat IPIS-ip ilisarnaataanik ineriartortitseqqinneruvoq. Taamaasilluni inuit innarluutit pillugit IPIS-ip ilisimasanik ingerlatitseqqinnermik siunnersuinermillu suliai tunniunneqarput, Inunnullu Innarluutilinnut Sullissiviup Nunamut Tamarmut Atuuttup suliassaanut ilanngunneqarlutik, taamaattumik IPIS-ip ilisarnaataata ilaasa Inunnut Innarluutilinnut Sullissiviup Nunamut Tamarmut Atuuttup ilisarnaatitaavani attatiinnarneqarnissaat aalajangerneqarpoq.

Inuit Innarluutillit taakkualu iluaqutaasa atugaannik pitsaanerulersitsinissaq pitsanngorsaanissarlu Naalakkersuisut annertuumik qitiutippaat, Inunnullu Innarluutilinnut Sullissiviup Nunamut Tamarmut Atuuttup ukiamut ammarneqarnissaa qilanaaraarput.

Inussiarnersumik inuulluaqqusillunga

Sara Olsvig
Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq

 

Allanik apeqqutissaqartoqarpat ministerimut allatsi Nina Jul Larsen attavigineqassaaq, oqarasuaat angallattagaq: +299 53 93 71, mail: nina@nanoq.gl