Tunngaviusumik inatsisissaq pillugu Isumalioqatigiissitaq ataatsimeeqqaarpoq

Isumalioqatigiissitami siulittaasoq, Vivian Motzfeldt ataatsimeeqqaarnermi eqqaamaqqusaasa ilagaat:

“Namminiilivinnissaq angutserlugu sulinissaq kikkut tamat pisussaaffigalugulu pisinnaatitaaffigaat. Namminiilivinneq tunissutaanavianngilaq suleqatigiinnikkullu angusassaalluni. Tunngaviusumik Inatsisissaq pillugu Isumalioqatigiissitami ataatsimeeqqaarnerput persuarsiorluta aallarnerparput inuiattut erinarsuutitsinnik atuilluta, oqaluttuarisaanermi alloriarfik pingaaruteqangaartoq. Inuiaat kalaallit pilluaritsi, alloriarfiit pingaarnersaat ikaarsaarfigineqarpoq. Ilissi ilagalusi Tunngaviusumik inatsisissarput ilusilersussavarput, tamatta piginnittooqataaffigisavarput. ”

Ataatsimeeqqaarnermi isumalioqatigiissitamit naqissuserneqarpoq tunngaviusumik inatsisissaq nunatta naalagaaffinngornissaanut tunngaviusussaq sananeqassasoq. Oqaatigereersutut Isumalioqatigiissitami Siulittaasunngorpoq: Vivian Motzfeldt (Siumut) Siulittaasullu tulliatut toqqarneqarpoq Mimi Karlsen (Inuit Ataqatigiit). Isumalioqatigiissitaq anersaaq nuannersoq isumaqatigiiffiusorlu atorlugu ataatsimiinnini ingerlappaa.

Tunngaviusumik Isumalioqatigiissitap pingaartillugu oqallisigaa, qanoq pitsannerpaamik isumatusaarnerpaamillu inuiannik ataatsimoortitsinissani, soorlu aamma oqariartuutigineqartoq inoqarfiit tamaasa akuutinneqarnissaat pingaaruteqartoq.

Pingaartipparput inuit tamat tunngaviusumik inatsimmik piginnittutut misigissuseqarnissaat, inuiaallu ataatsimoornermik anersaaqarluta alloriarfigissagipput oqariartuutigalugu.

Naleqartitat annertuumik eqqartuiffigineqarput, nunamik imartatsinnik pisuussutaanillu piginnittuunitta ersarissumik naqissuserneqarnissaa oqariartuutinut pingaartunut ilaapput soorluttaaq aamma assigiinngisitaartuunerput inissaqartillugu assigiinnerusunik periarfissaqarnissarput oqariartuutigigipput. 

Nunami isorartoorsuarmi inuuvugut, inuiaassuserput naleqartitavut oqaatsivut tassaapput kinaassutitsinnut tunngavigisavut illersorneqartariaqartullu.

Naalagaaffik qanoq ilusilik pilersinneqassasoq inuiaat kalaallit peqatigalugit ilusilersorneqassaaq, soorlu aamma tamat oqartussaanerat qanoq ilusilerlugu suliarineqassasoq tamatta immersueqataaffigissagipput. Inuiaavugut ikittunnguit ikinnerussuteqalinnginnissarlu qularnaarniarlugu oqaatigaarput tamat oqartussaanerat immikkut illersorneqartariaqartoq.

Naalagaaffiit Peqatigiinnut nunatta naalagaaffittut allatut ataqqinassuseqarluni ilaasortanngornissaa Naalagaaffinngornermi angusassaavoq, soorluttaaq aamma illersornissaq pillugu NATO periarfissatut eqqartuiffigineqartoq.

Pingaartipparput allaffeqarfissatta pilersilertorneqarnissaa, suliat pingaarutillit aallartisapallanniassammata.

Suliassaq angeqaaq qanortoq nunarput asasarput pillugu suleqatigiilluarisa.


Annertunerusumik paasisaqarusunnermi AC-fuldmægtig, Hans Peder Kirkegaard, hpki@nanoq.gl, tlf: 34 68 44

Annertunerusumik paasisaqarusunnermi Tunngaviusumik Inatsisissami siulittaasoq, Vivian Motzfeldt, vivian@inatsisartut.gl