Tunngaviusumik inatsisissaq pillugu sulinissaq paaseqatigiiffigineqarpoq

Namminiilivinnermut, Nunanut Allanut Nunalerinermullu Naalakkersuisoq, Suka K. Frederiksen Inatsiseqarnermut ataatsimiititaliaagallartoq Isumalioqatigiissitami siulittaasoq siulittaasullu tullia ataatsimeeqatigiipput

Namminiilivinnermut, Nunanut Allanut Nunalerinermullu Naalakkersuisoq, inatsiseqarnermut ataatsimiitsitaliaq taavalu tunngaviusumik Isumalioqatigiissitaq paaseqatigiinnissaq siunertaralugu Tunngaviusumik Inatsisissaq pillugu Isumalioqatigiisitamut suliakkiissutinut najoqqutassiaq oqaluuseraat.

Kalaallit Nunaanni inatsisinut tunngaviusussanut isumalioqatigiissitamik pilersitsinissamut nalunaarusiaq kiffaanngissusermik akisussaaffimmillu annertuumik isumalioqatigiissitamut tunisivoq.

Naalakkersuisut namminiilivinnissaq anguniarpaat, soorluttaaq siammasissumik tunngaveqarluni suliassat allattorsimaffiat tunniunneqartoq: 

“Isumalioqatigiissitap suleriaasertik nammineq aalajangertussaavaat. Isumalioqatigiissitap piffissaliussaq qanoq atussanerlugu aalajangertussaavaa soorluttaaq sivitsuinissamik pisariaqartitsisoqarpat tamanna pisinnaasoq ersarissarneqarpoq.

Naalakkersuisut Isumalioqatigiissitaq Inatsiseqarnermut ataatsimiititaliarlu suleqatiginissaat qilanaaraat. Innuttaasut sapinngisamik annertunerpaamik peqataatinneqartussaapput, paasititsiniaanermullu atugassat maanna suliarineqarlutik ingerlanneqarlutik”, Naalakkersuisoq, Suka K. Frederiksen oqarpoq.

Tunngaviusumik isumalioqatigiissitaq ullaaq ataatsimeeqqaarlutik inissitsiterput, sulinertillu aallartissinnaanngorlugu: 

“Isumalioqatigiissitaq suleqatigiinnissamut qilanaarpoq. Isumalioqatigiissitaq tunngaviusumik inatsisissamik suliaqarniarpoq Nunatta Naalagaaffinngornissaannut atuutilersussamik.” Isumalioqatigiissitami siulittaasoq, Vivian Motzfeldt, oqarpoq.


Annertunerusumik paasisaqarusunnermi naalakkersuisup allattaa Naasunnguaq Olsen, tlf. 34 54 14, e-mail: nasu@nanoq.gl attaveqarfigineqassaaq

Annertunerusumik paasisaqarusunnermi inatsiseqarnermut ataatsimiitsitaliami siulittaasoq, Anders Olsen, tlf. +299 49 07 08

Annertunerusumik paasisaqarusunnermi Tunngaviusmik Inatsisissami siulittaasoq, Vivian Motzfeldt, tlf +299 55 56 41