Naligiissitaaneq inuiaqatigiinni inissaqartitsinermut naligiissitsinermullu aamma tunngavoq

Arfininngorneq ulloq 20. maj tassaavoq Kalaallit Nunaanni Naligiissitaanermut ullorititaq. 

Naligiissitaanermut ullorititami Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoq Sara Olsvig, Nuuk Centerimi naligiissitsineq pillugu aaqqissuussamut tamanut ammasumut qaaqqusivoq. 

"Naligiissitaaneq arnat angutillu naligiissitaaneranut taamaallaat tunnganngilaq, naligiissumilli aamma pinninnissaq, tassa naligiissitsineq, inuit ataasiakkaat akornanni inuppaallu akornanni, pineqarpoq. Uani imminut ataqqeqatigiinneq assigiinngisitaartuunermillu inissaqartitsineq pineqarpoq", Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoq Sara Olsvig taama oqarpoq.

Ukioq manna sammisassaq tassaavoq inuiaqatigiinni naligiissitsineq

Ukioq manna Naligiissitaanermut ullorititami naligiissitsineq sammineqassaaq. Kikkut tamarmik naligiimmik inuiaqatigiinni periarfissaqartinneqassapput  – suiaassuseq, ammip qalipaataaa, inuiattut aallaavik, oqaatsit, upperisaq, innarluuteqarneq, akissarsiat, utoqqaassuseq, suiaassutsimik ornigisaqarneq,  il.il apeqqutaatinnagit.

Peqatigiiffiit kattuffiillu arlaqartut aaqqissuussami saqqummiussinissaminnut taamalu inuiaqatigiinni naligiimmik pinninnissamut qanoq suliniuteqarnerminnik oqaluttuarlutik peqataanissaannut qaaqquneqarput. 

”Inuiaqatigiinni naligiimmik pinninnissap isiginiarnissaa pingaaruteqarpoq. Immitsinnut ataqqissaagut assigiinngissuteqarnerpullu akueralugu. Taamaattumik nuannaarutigaara naligiissitsineq pillugu aaqqissuussatsinnut taama amerlatigisut soqutiginnilluarmata", Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoq Sara Olsvig taama oqarpoq, naggasiullugulu oqarluni "Inuiaqatitsinni oqaatsit pillugit oqallinnerit initusaqisut takujuarparput. Oqaatsit pillugit aaqqissuussamut plakatinik saqqarmiunillu sanasimavugut oqaatsit pillugit nakkarsaanani akerlianilli oqaatsinik ilinniarnissamut kaammattuuteqarnissamik oqariartuutitallit".

Aaqqissuussaq ukioq manna Nuummi pissaaq Naalakkersuisoqarfimmiilli ukiuni aggersuni Naligiissitaanermut ullorititami sammisaqartitsinerit illoqarfinnut amerlanerusunut siammarnissaat pilersaarutigaa.

Peqatigiiffiit kattuffiillu ataani allassimasut ilaatigut peqataassapput:

Sorlak, MIO, Nakuusa, LGBT, S.I.K., KTK, KNIPK, Nusuka, Inooqat, Naligiissitaanermut Siunnersuisoqatigiit, IKIU, Katuffik Utoqqaat Nipaat, Peqatigiiffik Kalaallit Meerartaat, Inuit Pisinnaatitaaffiinut Kalaallit Nunaata Siunnersuisoqatigiivi.

Aaqqissuussaq nal. 11:00 Sara Olsvig-ip tikilluaqqusineranik aallartissaaq nal. 14:00-ilu naammassilluni.

Pisup ingerlanerani oqalugiartoqartassaaq, suliniut "Blackout" takutitsissaaq, unammisitsisoqassaaq il.il.

Kikkulluunniit peqataanissamut tikilluaqquneqarput. 

Paasissutissat allat naalakkersuisup allattaanut saaffiginnilluni pissarsiarineqarsinnaapput: Nina Jul Larsen, oqarasuaat 53 93 71.