Qimmiaqqat 12-nik sapaatip akunneqartillugit akiuussutissamik kapineqassapput

Uumasut Nakorsaqarfik Inuussutissalerinermillu Oqartussaaffiup innersuussutigivaa qimmiaqqat 12-nik aamma 16-inik sapaatip akunneqartillutik aamma 1-imik ukioqartillutik akiuussutissamik kapineqartassasut. Kingornalu qimmit ukiut pingasut qaangiukkaangata akiuussutissamik kapineqaqqittassallutik.

Oqartussaaffiullu aamma kajumissaarutigivaa qimmiaqqat 16-inik sapaatip akunneqartillutik  kingornalu qimmit ukiut pingasut qaangiukkaangata, inatsisit naapertorlugit, perlerornermut akiuussutissamik kapineqartassasut.

Sunaana qimmit nappaataat, canine distember virus

Qimmit nappaataat atugaasorujussuusoq tunillannartuuvoq, virusi tamatumunnga napparsimatitsisuulluni. Qimmit, terianniat, amaqqut uumasullu taakkununnga assigisut, soorlu minkit frittillu nappaatigisarpaat.

Pingaartumik qimmit arlaannguuttut nappaatiginerusarpaat, qimmilli inersimasut utoqqalisimasullu aamma nappaatigisinnaasarpaat.

Qimmeq peqqittoq qimmimit napparsimasumit attuuatilluni tunillanneqartarpoq, qimmerluunniit qisermit tunillanneqarsimasumit iisinermigut napparsimalersinnaavoq, isit qingallu qinersiisa seerisuinit tullanneqarsinnaavoq, aamma ananit quumiilluunniit.

Qimmeq napparsimanngitsoq qimmip napparsimasup quuanut tummarsinnaavoq, issikkamigut aamma tummalaarsinnaallugu, kingorna aluttukkaminik.

Qimmilik taamaalilluni nappaat tuniluunnartoq angerlarsimaffimminut eqqussinnaavaa, soorlu kamiisa aluaniittoq eqqunneqarsinnaalluni.

Perlerorneq*, qimmit nappaataat Parvovirusilu tassaapput akiuussutissamik kapititsinikkut akiugassat pingaarnersaat, kalaallit qimmiinut nappaalatitsinaveersaartitsissalluni pingaaruteqartorujussuaq.

*Inatsisit naapertorlugit kalaallit qimmii tamavimmik qimmillu allat nunatsinniittut perlerornermut akiuussutissamik kapitinneqartussaapput.

Qimmip nappaataata malunniutai:

Virusi timip ipiutaasartai tamaasa siammarfigigaangamigit nappaat malunniutilersarpoq. Qimmeq ullut pingasut angullugit 39,5-40,5 gradinik kissarneqalersarpoq.

Kingorna kissarneerukkiartortarpoq, nalinginnaasumik kissarneqalersarluni. Ullut marluk qaangiukkaangata kissarneqaqqilersarpoq, bakteriat napparsimalersitsisuullutik.

• Uku malunniutaasinnaallutik:

• Nerisassanik nakerisaqannginneq

• Isinit qingamillu qorsuppaluttumik seerineq

• Meriarneq timminnerlu

• Panertoorneq

• Quersorneq/ bronkitis/puallunneq

• Isigai sigguilu issutsinneri

Nakorsartinneq:

Qimmit nappaataat katsorsarneqarsinnaanngilaq. Bakteriamik nappaataalersut akiuussutissamik katsorsarneqarsinnaapput, nappaatit pisariaqartitsineq naapertorlugu katsorsarneqarsinnaallutik (panertoortitsinermi imertitsilluni il.il.).

Katsorsaasoqaraluartoq qimmit amerlasuut toqusarput taamaammat Uumasut Nakorsaqarfik Inuussutissalerinermillu oqartussaaffimmit innersuutigineqarpoq qimmit napparsimasut toqunneqartarnissaat.

Attavigineqarsinnaavoq: uumasut@nanoq.gl, Oqarasuaat 345000, Uumasut Nakorsaqarfik Inuussutissalerinermullu Oqartussaaffik