2017-imi Kulturimut aningaasaliissutaannik agguaassineq siulleq

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup, Doris Jakobsen-ip, 2017-imi siullermeertumik qinnuteqaateqartitsinermut atatillugu suliniutinut assigiinngitsunut 37-inut katillugit 3.950.373 koruuninik tapiissutinik agguaassivoq. Aningaasat agguaanneqartut aningaasaliiffinniit pingasuniit ataani pineqartuniit agguaanneqarput.

Kultureqarnermut aningaasat
Kultureqarnermut aningaasanit suliniutinut assigiinngitsunut arfinilinnut 1.069.008 koruuninik tapiissutinik tunniussisoqarpoq, taakkunannga ilaatigut eqqumiitsulianik saqqummersitsinerit, isiginnaartitsinerit assigisaallu matussusiivigineqarput. Aningaasat inunnit ataasiakkaanit, kattuffinnit il.il. suliaminnut suliniutiminnullu atatillugu qinnutigineqarsinnaapput, pingaartumillu aningaasarsiutigalugu eqqumiitsuliortut ingerlataannut suliniutaannullu suliniutinullu allanut eqqumiitsuliornikkut qaffasissusilimmik suliaasunut aningaasat tunniunneqarnerusarput.

Filmiliornermik ingerlataqartunut aningaasat
Filmiliornermik ingerlataqartunut aningaasanit filmiliornermik pilersaarutinut qulingiluanut katillugit 1.587.793 koruuninik tapiissutinik tunniussisoqarpoq. Filmiliornermik ingerlataqartunut aningaasanit kalaallit filmiliornermik pilersaarutaanut tapiissutinik qinnuteqartoqarsinnaavoq, pingaartumik oqaluttualiornernut piviusuliornernullu.

Atuakkat kalaallisoortut
Atuakkanut kalaallisut allatanik saqqummersitsisussanut tallimanut aningaasanik katillugit 479.571 koruuninik agguaassisoqarpoq.

Kulturimik sulialinnut aningaasaliissutit
Taakkua qaavisigut kulturimik sulialinnut qaammammut agguaanneqartartut 22.000 kr. eqqumiitsuliornikkut suliaqartunut qulingiluanut agguaanneqassapput.

Ukiumi matumani kingullermik qinnuteqaateqartitsinermi sulinermut aningaasaliissutinik tunniussisoqanngilaq.

Suliat aningaasaliiffigitittut allattorsimaffiat uani aaneqarsinnaapput.

Qinnuteqarnissap tullianut piffissaliussaq ulloq kingulleq tassaavoq 1. maj 2017. Namminersorlutik Oqartussaniit Kulturimut aningaasaliissutit pillugit sukumiinerusumik paasissutissanik pissarsiniartoqarsinnaavoq nittartakkakkut www.sullissivik.gl-ikkut

Sukumiinerusumik paasisaqarnerorusukkaanni, Naalakkersuisup allattaa Rosa Thorsen rosat@nanoq.gl +299 34 57 02-mut sianerluni paasiniaasoqarsinnaavoq.