Ataatsimeeqatigiinneq

Naalakkersuisup Múte B. Egedep aamma danskit Assartuussinermut, Illuuteqarnermut Ineqarnermullu Ministeriata Ole Birk Olsenip ataatsimeeqatigiinnerat

7. april 2017-imi Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisup danskit Assartuussinermut, Illuuteqarnermut Ineqarnermullu Ministeriat Ole Birk Olsen ataatsimeeqatigaa.

Ataatsimiinnermi suliat ataatsimut soqutigisaqarfiusut oqallisigineqarput, tassanilu Naalakkersuisoq Kalaallit Nunaanni silaannartaq aammalu silaannakkut angallassinerup aqunneqarnera, siunissami Kalaallit Nunaanni mittarfiit aaqqissuunneqarnerat kiisalu Kalaallit Nunaanni qamutinik assakaasulinnik misissuisarneq pillugit suliat oqallisiginissaannut periarfissarsivoq.

Naalakkersuisoq Múte B. Egede oqarpoq: ”Danskit Assartuussinermut, Illuuteqarnermut Ineqarnermullu Ministeriat Ole Birk Olesen pitsaasumik pilersitsiviulluartumillu ataatsimeeqatigigakku iluarisimaarpara. Suliassaqarfiit piffissami Kalaallit Nunaanni silaannakkut angallannerup ineriartupiloorfigiligassaani uatsinnut pingaaruteqartut pitsaasumik pissarsiaqarfiulluartumillu oqallisigaavut.

Suleqatigiilluarnitta ingerlareersup ingerlaqqinnissaata pingaaruteqarnera oqallisigissallugu periarfissarsivugut. Taamatuttaaq Kalaallit Nunaata piffissap ingerlanerani silaannakkut angallassinermi suliassanik amerlanerusunik isumagisaqarsinnaalernissaanut isumagisaqalernissaanullu isumaliutivut takorluukkavullu danskit ministeriannut periarfissaq manna atorlugu saqqummiuppakka.

Kiisalu siunissami nunakkut assartuussinermi isumannassutsimik siuarsaanissamut aaqqiissutissanik misissuinissarput paaseqatigiissutigaarput. Tassunga atatillugu isumaqatigiissutigineqarpoq periarfissaasinnaasut assigiinngitsut atorlugit piffissalikkamik qamutinik assakaasulinnik misissuisarnerup eqquteqqinneqarsinnaanera.”

Tusagassiorfinnut nalunaarut manna pillugu allanik apeqqutissaqartoqaruni naalakkersuisup allattaa Jane Petersen Lantz telefonnr. 597909-mut attaveqarfigineqarsinnaavoq.