Nunatsinni aalisarnermik ilisimasaqarluartoq toquvoq

 

Aajuusaarutigeqisannik ataasinngornermi apriilip ulluisa 10-anni ilisimatinneqarpunga Aalisarnermut Piniarnermullu Naalakkersuisoqarfimmi immikkoortortami pisortaq, Petrus Holger Biilmann, toqukkut qimagussimasoq.  

Naalakkersuisut sinnerlugit nulianut, qitornaanut qanigisaanullu misiginneqataanera matumuuna nalunaarutigaara.

Nunatsinni aalisarnermik ilisimasaqartut Petrus Holger Biilmaannimik, nunatsinni aalisarnermik ilisimasaqarluaqisumut, toqukkut qimagunneratigut maqaasissapput.

Petrus Holger Biilmann aalisarnermik ukiuni  kingullerni amerlaqisuni suliaqartarsimanermigut, nunatsinni aalisarnerup ineriartornera mikinngitsumik sunniuteqarfigisimavaa.

Aalisarnermut Piniarnermullu Naalakkersuisoqarfimmi apriilip aallaqqaataani atorfinippoq. Suliffittaaminut apriilip pingajuanni suliartorpoq,  toquffissami sapaatip akunnera ataaseq sioqqullugu suliartorluni.

Atorfininnermini siunertarilluinnarsimavaa aalisarnermut inatsisissap,  naammassiniarlugu qangali suliaasup, suliarineqarnerat sunniuteqaataalluassalluni.

Qularutiginngilluinnarpara aalisarnermut inatsisissamut sunniuteqataalluarsimassagaluarmat, nunatsinni aalisarnermut ilisimasaqartorujussuummat.

Petrus Holger Biilmann ilisarisimava nuannaartuullunilu suliassaminut naammassisaqarluarniartuusoq, tunniussimasuusorlu. 

Maniitsumi 1954-mi inunngorpoq, Aalisarnermut Piniarnermullu Naalakkersuisoqarfimmi immikkoortami pisortanngortinnani KNAPK pisortaavoq. Aalisarnermut pisortaqarfiusimasumi allaffimmi  pisortaasimavoq, ilaatigut APK-mi, avataasiortut kattuffianni, kingorna pisortaalluni.

Ikast Handelsskolemi niuernermik ilinniarsimasuuvoq. Ilinniareernermi kingorna ilinniarsimasani ilaterlugit pikkorissartuarpoq, pisortatut sulisarnermini iluaqutigisarsimasaminik.

Inuusuttuutilluni sisoraatinik ujakkaallaqqissorsuuvoq arlaleriaqaluni isorartussutinut assigiinngitsunut nunatsinni pissartaasarluni. Timersuummut taekwondo-mut aamma pillaqqissuulluni.

Petrus Holger Biilmannip nuliani Charlotte aamma meeqqani pingasut ernuttanilu ataaseq toqukkut qimartarai.

Eqqaaneqarnera ataqqinartuuli.

 

Hans Enoksen,
Aalisarnermut Piniarnermullu Naalakkersuisoq

 

Attavigineqarsinnaavoq Aalisarnermut Piniarnermullu Naalakkersusoqarfimmi pisortasaneq, Jørgen Isak Olsen. Email: jio@nanoq.gl