Immap assingi imarsiornermilu ajunaalernermut isumannaallisaanermullu radioqarneq

Naalakkersuisup Múte B. Egedep aamma danskit Nukissiuuteqarnermut, Pilersuinermut Silallu Pissusianut Ministeriata Lars Christian Lilleholtip ataatsimeeqatigiinnerat

8. april 2017-imi Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisup danskit Nukissiuuteqarnermut, Pilersuinermut Silallu Pissusianut Ministeriat Lars Christian Lilleholt ataatsimeeqatigaa.

Ataatsimiinnermi tassani Naalakkersuisup danskillu ministeriata sulianik arlalinnut tunngasunik oqaloqatigiissuteqarsinnaanerminnut periarfissarsipput. Kalaallit Nunaanni imaatigut angallannermi isumannaassutsip siuarsaaffiginissaanik Naalakkersuisut kissaateqarnerannik aallussinissaq suliani taakkunani ataatsimoorfiuvoq. Tassalu Kalaallit Nunaata imartaani immap assinginik sanaartornermi suleqatigiinnissamut isumaqatigiissummi killiffik politikkikkut naliliiffigineqarpoq. Tamatuma saniatigut imarsiornermi ajunaalernermut isumannaallisaanermullu radioqarnermut pilersaarutit oqallisigineqarput.

Ataatsimiinnerup naammassinerani Naalakkersuisoq Múte B. Egede oqarpoq: ”Kalaallit Nunaanni imaatigut angallannermi isumannaassutsip sapinngisamik annertunerpaamik siuarsarneqarnissaa, tassungalu ilanngullugu Kalaallit Nunaata imartaani immap assiliornermi suleqatigiinnissap salliutinneqarnissaa pillugu Naalakkersuisut kissaateqarnerannut danskit ministeriata isumaqataanera iluarisimaarpara. Suleqatigiinnissamut isumaqatigiissut atuuttoq piffissamullu pilersaarut isumaqatigiissutaasoq unammillernartortaqarmata nassuerutigisariaqarpara. Tamanna tunngavigalugu oqaatigisinnaavara, immap assinginik pilersuinissap kinguaattoorsinnaanera naatsorsuutigisariaqaratsigu. Ataatsimiinnerup kingunerani danskinit immap assingisa sapinngisamik annikinnerpaamik kinguaattoornissaat qulakkeerniarneqarnera tatigaara.

Tamatuma saniatigut paasivara danskit ministeriata, imarsiornermi ajunaalernermut isumannaallisaanermullu radioqarnermi sullissinerup siunissami qanoq aaqqissuunneqarsinnaaneranik aaqqissuunneqarnissaanillu, teknikkimut aaqqiissutissat suut sullissinermut pitsannguutaasinnaanerinut, minnerunngitsumillu VHF-imik attaveqarfiusinnaasut qanoq ililluni pitsannguiffigineqarsinnaanerinut suli paasiniagassartaqarnerat eqqumaffigigaa.

Angalasartunut tamanut imaani isumannaallisaanissaq salliutinneqarnissaa pingaarnerpaatinneqarpoq. Minnerunngitsumik inuussutissarsiutitsinni pingaarnerpaami, tassalu aalisarnermi pissutsit sapinngisamik isumannaannerpaanissaat pingaaruteqarpoq. Taamaattumik danskit ministeriannut erseqqissaassutigaara naatsorsuutigilluinnarlugulu Kalaallit Nunaanni siunissami imarsiornermi radiut ajunaalernermut, nukingiussinermut isumannaallisaanermullu atorneqarnerannut tunngasunik anguniagaqarnerunissaq. Danskit ministerianuttaaq erseqqissuliorpunga teknologiip atorneqartup pissutsinut naapertuunnerusunngorlugu iluarsineqarnissaata qulakkeerneqarnissaa suliami ingerlasumi annertunerusumik siunnerfigineqarnissaa naatsorsuuteqarfigigakku. Taassuma saniatigut erseqqissuliorfigaara teknikkikkut aaqqiissutissatut atuuttussanngortinneqartussat Kalaallit Nunaata imartaani VHF-ip atorsinnaaffiinut tamarmiusunut pitsanngoriaateqartitsisuunissaat naatsorsuutigalugu.

Immap assiliornerim aammalu imarsiornermi radiut ajunaalernermut, nukingiussinermut isumannaallisaanermullu atorneqarneranni suliassaqarfiit angisuut unammillernartullu marluupput. Suliassaqarfiit danskit tungaanniit salliutinneqarnerat, aammalu Naalakkersuisoqarfimma danskillu ministereqarfiata akornanni oqaloqatigiinnerup pitsaasup ingerlaqqinnissaa pillugu oqaloqatigiilluartoqarnera iluarisimaarpara.

Unammilligassat pillugit suliassat pilersitsiviulluartussatut misigaakka, aammalu suliap ingerlaqqinnissaa illuatungeriinnut naammagisimaarnartumik ingerlassasoq qularutiginngilara.

Nukissiuuteqarnermut, Pilersuinermut Silallu Pissusaanut Ministeri atorfilittaalu ataatsimeeqatigiilluarnitsinnut qutsavigaakka.”



Tusagassiorfinnut nalunaarut manna pillugu allanik apeqqutissaqartoqaruni naalakkersuisup allattaa Jane Petersen Lantz telefonnr. 597909-mut attaveqarfigineqarsinnaavoq.