Ineriartorneq arlaata aallartittariaqarmagu…

Isornartorsiorneq inissaminiikkaangat akuerisarpara. Kukkusumimmi iliorsimagaanni aalajangersimagaanniluunniit tamanna nassuerutigisariaqarpoq iliuuseqarfigineqarlunilu.

Kisianni Sermitsiaq normu 9 atuarakku assut tupaallappunga. Qaasuitsup Kommuniani borgmesterip Ole Dorphip Naalakkersuisut ineriartornermik unitsitsinerarpai aaqqissuusseqqinnissanullu pilersaaruteqannginnerarlugit.

Taamannak oqaaseqarnera Demokraatineersup Randi V. Evaldsenip Naalakkersuisut aaqqissuusseqqinnissanut pilersaaruteqarneranik apeqqutaanut akissutinnik ilaatigut aallaaveqarput. Erseqqissaassutigereerpara Naalakkersuisut aaqqissuusseqqinnissanut pilersaarutaat piffissanngorsorigutsigu saqqummiukkumaarivut. Inatsisartunut ilaasortat ataasiakkaat apeqquteqarnerat aallaavigalugu tamanna pissanngilaq, aatsaalli Inatsisartunut tamanut oqallisigineqarsinnaasunngorlugit saqqummiussinnaanngorutsigit pissalluni. Oqallinneq isumaqatiginninniarnerlu inissamini ingerlanneqassaaq, tassalu Inatsisartuni.

Tamanna Randi V. Evaldsenimut erseqqissaassutigineqarpoq ilanngullugulu susassaqarfinni sorlerni aaqqissuusseqqittoqarnissaanik siunnersuuteqassamaarnitsinnik nassuiaateqarlunga. Paasinarporli nalunngisassaminnik arlallit eqqaamannissimanngimmata, soorlu Ole Dorphitut. Tupaallaatigaara Ole Dorphimi Naalakkersuisunut Inatsisartunullu ilaasortaanikuuvoq.

Borgmester Ole Dorph allaaserisami tassani aamma illoqarfiup mittarfiata tallineqarnissaanut pilersaarutinik Naalakkersuisut unissaasimanerarpai. Sooq asuli oqaluttoqassava? Naalakkersuisut 2015-imi pisinnaatinneqarput Ilulissani mittarfik nunanut tamalaanut naleqqussagaq sananeqassasoq. Tamanna nalornissutigigaanni aviisimi tassani, Sermitsiaq normu 9-mi quppernermi 55-imi, quppernermik ilivitsumik annoncemi atuarneqarsinnaavoq Kalaallit Airport A/S siunnersortissarsiortoq mittarfissat illutassaasalu pilersaarusiornissaannik suliaqartussamik. Misissueqqaarnerit aallartereerput. Taakku erseqqilluinnartumik uppernarsaataapput Ilulissani, Nuummi Qaqortumilu mittarfissat pivisusunngulernerannut.

Ole Dorphip isornartorsiornera inissaminiinnanilu piviusorsiunngitsutut isigaara. Ole Dorphip isornartorsiornera nammineq mittarfimmut suliniutigisimasami piviusunngunngitsoorsimaneranut naammagittaalliutaanerusoraara.

Ole Dorphili isumaqatigaara oqarmat, aningaasarsiornikkut siuarsaanissamut suliffissanillu pilersitsinissanut takornariaqarnermik, aalisarnermik aatsitassarsiornermillu inuussutissarsiutinik inerisaanissanut mittarfiliornerit politikkikkut suliniutini pingaarnerit ilagigaat.

Upperivarput angallannikkut pitsaanerusumik aaqqissuussinikkut takornariat amerlanerulerlutillu inuussutissarsiornikkut pissanganaatilinnik periarfissiisoqassasoq. Ole Dorphip uggoraa Ilulissani mittarfik borgmesteriunermi nalaani sanaartorneqassanngimmat. Kisianni eqqaamasariaqarpaa Naalakkersuisut tamakkiisumik isiginnittussaammata. Naalakkersuisut nuna tamakkerlugu innuttaasunullu tamanut iluaqutaasussanik aaqqiissutissarsinissaq anguniarpaat.

 

Inussiarnersumik inuulluaqqusillunga

Kim Kielsen,
Naalakkersuisut Siulittaasuat