Inuusuttut suliffissaaleqisut ikinnerulersinnissaat Naalakkersuisut pingaartippaat

Ullumi KNR-i Qaasuitsup Kommuniani inuusuttut untrikilikkaat unittoorsimanerannik qulequtaqartumik ilanngussaqarpoq.

Ilanngussamilu uagut ilinniartitaanermik pilersaaruteqannginnerput periusissiaqannginnerpullu pissutigalugu inuusuttorpassuit katataatittarivut, Qaasuitsup Kommuniani fagchefi oqaluttuarpoq.

Tassunga atatillugu upernaaq manna Inatsisartut ataatsimiinneranni ilinniartunik praktikertunillu atorfinitsitsinertigut inuiaqatigiinni akisussaaneq pillugu inatsisissatut siunnersuummik Naalakkersuisut saqqummiussinissaat, Naalakkersuisut erseqqissaatigiumavaat. Siunnersuut 2016-imi Inatsisartut ukiaanerani ataatsimiinneranni saqqummiunneqartussaagaluarpoq, ukioq mannalu upernaakkut ataatsimiinnissamut kinguartinneqarluni – taamaaliornermilu inatsisissatut siunnersuutip inaarutaasumik ilusilersornissaa pillugu sulisoqarnermi illuatungeriit, kommunit naalakkersuisoqarfiillu oqaloqatigineqarnissaat siunertaavoq.

Mannalu inatsisissatut siunnersuut nalimmassagaq naammassivarput.

Inatsisissatut siunnersuutikkut ilinniartut praktikerfissaasa 400-nik amerlineqarnissaat, 2022-mullu praktikerfissat qulakkeerneqarnissaat siunertarineqarpoq.

Suliffeqarfiit pisortallu oqartussat inuiaqatigiinni akisussaaffimmik tigusillutik nunaqavissunik ilinniartunik praktikerfissanillu pilersitsinikkut suleqataanissaat siunnersuummi siunertarineqarpoq. Taamaalilluni Kalaallit Nunatsinni suliffeqarneq piginnaassutsillu patajaallisarneqarnerat anguneqassaaq.

Naatsumik oqaatigalugu pisortat oqartussaasut suliffeqarfiilluunniit pisortanit pigineqartut aqqaneq marlunnik sulisoqaraangamik ilinniartumik ataatsimik atorfinitsitsisarnissaat inatsimmi siunertaavoq. Oqartussaasulli praktikerfissatut akuerineqarsimanngikkunik ilinniartunik praktikertunilluunniit atorfinitsitsinissamut pisussaaffeqassanngillat.

Suliffeqarfinnullu namminersortunut inatsisip ilusilerneqarneratigut bonuseqartitsinermik aaqqissuussinikkut kiisalu tamanut ammasunik neqeroortitsinerni ilinniartoqarnerup praktikertoqarnerullu nalilersuinermi ilanngunneqarneratigut, ilinniartunik praktikertunillu atorfinitsitsinissaq aningaasaqarnikkut kajuminnarnerulersinneqarpoq.

Majorianullu angusassatut isumaqatigiissutini inuusuttunut suliffissaaleqisunut suliniarnerup patajaallisarnissaa ilanngunneqarmat ilanngullugu tikkuassavara, tassunga ilanngullugit atuagarsornerit piginnaanngorsaanerillu. ’Inuusuttut suliffissaaleqinerat annertuumik apparneqassaaq’ qulequtsiullugu ukiumut ilinniartussat allat 250-it Majoriamut innersuunneqartarput.

Kommunalbestyrelsi inuusuttunut 18-it 29-illu akornanni ukioqartunut suliniutiminik nalunaarsuisussaatitaavoq. Taakku suliffeqarnermi, ilinniarfinni piginnaanngorsaavinniitinneqassapput, tassunga ilanngullugit atuagarsornermik atuagarsorfiunngitsumillu ingerlatat. Inuusuttoq siuliani taaneqartunut akuutinneqanngippat, pineqartoq piginnaanngorsaanernut, suliffimmi nikerartumi, soraarnerussutisialittut isumaginninnikkulluunniit allatut aaqqissuussamut akuutinneqassaaq. Kommunalbestyrelsi immikkoortunut ataasiakkaanut tamanut sooq taakku neqeroorutinut/ingerlatanut ilaatinneqarnerannik 1. april aamma 1. september nassuiaasiortassaaq, tassunga aamma ilanngullugit suliffissaaleqisut 30-nik taakkulu qaangerlugit ukiullit ilanngullugit.

Naggataajullu 2013/2014-imilli suliffissaaleqisut ikiliartornerat ilanngullugu oqaatigissavara – ilaatigut Naalakkersuisut nuna tamakkerlugu suliffissaaleqinermik akiuiniarnermik pilersaarutaanni ”Suliffeqarneq Toqqissisimanartoq”-mi suliniutit kingunerisaannik. Tulliuttumi takuneqarsinnaasutut ukiuunerani aasaaneranilu suliffissaaleqineq malunnaatilimmik appariarpoq.


Aasaanerani suliffissaaleqineq

Juli 2013

Juli 2014

Juli 2015

Juli 2016

Amerlassutsit

3.382

3.360

2.986

2.433

Ukiuunerani suliffissaaleqineq

Januar 2014

Januar 2015

Januar 2016

Januar 2017

Amerlassutsit

4.954

4.402

4.031

3.915

Paasissutissat erseqqinnerusut pillugit Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisoq, naalakkersuisup allattaa Akitsinnguaq Olsen aqqutigalugu mobilikkut 58 89 19-ikkut attavigiuk