Peqqinnissaqarfiup siunertaanngitsumik kukkunerit ilikkagaqarfigalugillu misilittagaqarfigaat

” Siunertaanngitsumik kukkunernut malitseqartitsinissaq taamaalillunilu napparsimasunik sullissinermi kukkunernik pitsaaliuineq Peqqinnissaqarfimmit suliniutigineqarpoq,” taamma oqarpoq Peqqissutsimut Naalakkersuisoq Agathe Fontain.

Immikkoortuni pisunik ataasiakkaanik suliaqartartunik, taama pisoqaqqinnginnissaa anguniarlugu aaqqiissuteqarnerit suliniutillu suut aallartisarneqarnissaannik suliaqartunik malitseqartitsisartunillu suleqatigiissitaqarnikkut, Peqqinnissaqarfimmi namminermi nalunaarsuineq atorneqarpoq.

Nakorsat qullersaat Anne Marie Ulrik ima nassuiaavoq: ” Ass. Danmark-imisut nuna tamakkerlugu siunertaanngitsumik kukkunerit amerlassusaasa nalunaarsorsimaffiannik, peqanngilagut, immikkoortunili taama pisoqaqqinnginnissaa qulakkeerniarlugu misilittakkanut pitsaaliuinermullu tunngatillugu sulianut, pingaarnertut siunertaasarialittut oqaatigisariaqartumik, pisut ataasiakkaat sulissutigineqartarput”.

Siunertaanngitsumik kukkunerit inuup kukkunerinagit aaqqissuussaanerup iluani pissusissamisuunngitsunik patsiseqarput. Tamanna ass. sulisilluni akornusersorneqarnikkut napparsimasup nakorsaatitugassaanik kukkusunik piareersisoqarsinnaavoq, inuttaanulli tunniutsinnagit paasineqarneranik kinguneqarsinnaalluni. Napparsimasorluunniit alla misissortinnissaanut ingerlanneqarsinnaavoq aqqa inuuialu eqqortumik apeqqutigineqanngippata, misissuinissarli aallartilersoq tamanna paasineqarluni.

Taakkunani marlunni pisoq nalunnaarutigineqarluni immikkoortup aqutsisuinit malitseqartinneqassaaq. Suleqatigiinnik pilersitsisoqassaaq, pisoq naliliivigineqassaaq pisariaqarpallu immikkoortumi aaqqissuussaanikkut nalimmassaasoqassalluni. Ass. suleriaatsit sukateriffigineqassapput imal. suleriaatsinik nutarterisoqassaaq.

Siunissaq
2018-imi iliuusissatut siunniussani nutaani napparsimasunut isumannaallisaaneq pillugu suliniuteqarneq tamatumunngalu atatillugu immikkoortuni ilikkakkanik suliffeqarfimmut tamarmut siammarsaanissamik qulakkeerineq qitiutinneqartussat ilagissavaat.
”Taamaliornikkut nuna tamakkerlugu takussutissamik ataatsimoortumik pilersitsinissamut, maanna siunertaanngitsumik kukkunernut iliuuseqarnermut tapertaalluartussamik periarfissaqalissaagut” Agathe Fontain oqarpoq.

Piviusut:
Siunertaanngitsumik kukkuneq qanoq paasineqassava?
Pisoq napparsimasup nappaataanik patsiseqanngitsoq, peqqinnissakkulli sullissisut nakorsaanermut paaqqutarinninnermullu atatillugu siunertaanngitsumik iliuusaat napparsimasumik ajoqusiisinnaasoq imal. ajoqusiisinnaagaluaq. Siunertaanngitsoq isumaqarpoq anguniagaanngitsoq.

Tusagassiorfinnut nalunaarut pillugu paasissutissat sukumiinerusut Mamn@peqqik.gl -imut attaveqarnikkut pissarsiarineqarsinnaapput