Oqarasuaatikkut siunnersuisarfiit ammasarfii sivitsorneqarput

Meeqqat Pisinnaatitaaffii pillugit Naalagaaffiit Peqatigiit Ataatsimiititaliaata kaammattuuteqarneratigut meeqqat, inuusuttut inersimasullu erloqinartorsiortut imaluunniit allanik pissuteqarlutik tapersersorneqarnissamik siunnersorneqarnissamillu pisariaqartitsisut oqarasuaatikkut siunnersorneqartarnerannut ammasarfiit sivitsorniarlugit Naalakkersuisut 1.4 mio. kr. immikkoortitsipput. Anguniarneqarpoq oqarasuaatikkut siunnersuisarfiit sapaatit-akunnerisa ulluini tamani nal. 16.00-mit 22.00-mut ammasassasut.

Nunatsinni sumiiffinni amerlasuuni, pingaartumik nunaqarfinni illoqarfinnilu minnerusuni, ilinniarsimasunit tapersersorneqarluni siunnersorneqarlunilu oqaloqateqarnissaq assut killeqarpoq. Oqarasuaatikkut siunnersuisarfiit ammasarfiisa sivitsornerisigut tapersersuinissamullu neqeroorutit nutaat pilersinnerisigut isumaginninnermi suliniutigineqartut pingaartumik isorliunerusuni nakussatsinnissaat kissaatigaarput, taama isumaginninnermut naalakkersuisoq Sara Olsvig oqarpoq.

Oqarasuaatikkut siunnersuisarfiit immikkoortortaqarfinni assigiinngitsuniittut siunissami isumaginninnermut Naalakkersuisoqarfiup ataani Isumaginninnermut Aqutsisoqarfimmi  ataatsimut katersorneqassapput, taamaaliornikkut ingerlatsinermi iluaqutissat oqarasuaatikkullu siunnersuisartut suliaqartarnermikkut pikkoriffiisa pitsanngorsarnissaat pilersinneqassapput.

Kommunini tapersersuinissamik neqeroorutit pitsanngorsartuarnissaat suli sulissutigissavarput. Tamanna Isumaginninnermut Aqutsisoqarfimmi siunertarineqartut pingaarnerpaat ilagaat. Misilittakkatigulli ilaatigut Islandimit nalunngilarput nunaqarfinni illoqarfinnilu minnerusuni innuttaasut imminnut ilisarisimalluarnertik pissutigalugu najukkaminni tapersersortissarsiortarnissartik sapernartittaraat inunnillu allaninngaaneersunik oqaloqateqarnissartik kajungerinerusaraat. Minnerunngitsumik tamanna arnanut kinguaassiuutitigut atornerlugaasimasunut persuttagaasimasunulluunniit atuuppoq. Oqarasuaatikkut siunnersuisarnerit sumiiffinni ataasiakkaani tapersersuinissamik neqeroorutinut tapertaalluarput, taama Sara Olsvig oqarpoq.

Ullumikkut oqarasuaatikkut siunnersuisarfiit tassaapput ATTAVIK146 inunnut imminornissaminnik eqqarsaateqartunut, Meeqqat inuusuttuaqqallu oqarasuaataat 134, Ilaqutariinnut siunnersuisarfik 31 41 51, Inersimasunut kinguaassiutitigut atornerlunneqarneq pissutigalugu kingunerlutsitsisunut siunnersuisarfik 141 aamma MIO SMS 1899. Oqarasuaatikkut siunnersuisarfiit pioreersut saniatigut aningaasaliissutit amerlanerusut, Naalakkersuisut persuttaasarneq akiorniarlugu periusissiaat 2014-2017 naapertorlugu, persuttarneqarsimasunut siunnersuinermut atorneqassapput. Oqarasuaatikkut siunnersuisarfiit ataatsimuulersinneqarnissaannut atatillugu oqarasuaatit ataatsimut normoqalersinnaanerisa misissuiffigineqarnissaanut periarfissaqalissaaq.

Siunnersuisarnerup annertusineqarnera 2017-imi aasap ingerlanerani piareernissaa naatsorsuutigineqarpoq.

Paasisaqarnerujumagaanni uunga attaveqartoqarsinnaavoq:

Naalakkersuisup allattaa, Nina Jul Larsen

Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfik 

Oqa. 34 66 38

E-mail: nina@nanoq.gl