Tasiilami immikkut suliniutit 2017-mi ingerlaannassapput

Naalakkersuisut siulittaasuata, Kim Kielsenip ukioq 2016 ”meeqqat ukiuattut” taavaa, tassungalu atatillugu suliniutit arlallit Tasiilami aallartinneqarput Kommuneqarfik Sermersooq suleqatigalugu. Naalakkersuisut maanna aalajangerput suliat 2017-imi ingerlateqqinneqassasut.

”Naalakkersuisut akisussaafittut suliassaasa pingaarnersaannut ilaavoq, Nunatsinni sumiluunniit najugaqaraluaraanni toqqissinarnerpaamik innuttaasut inuuneqarnissaat,” Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Doris Jakobsen, suliap nangeqqinneqarneranut ataqatigiissaarisussatut toqqagaasoq oqarpoq, nangillunilu:

Ajoraluartumik Tasiilaq ukiut ingerlanerini assigiinngitsutigut sakkortoorujussuarnik eqqugaasarsimavoq, taamaammallu immikkut iliuusissanik pisariaqartitsisoqarpoq, massakkorpiaq innuttaasunik ikiorsiissutaasinnaasunik. Kisiannili aamma pisariaqarpoq ungasinnerusoq eqqarsaatigalugu qanoq iliuuseqarsinnaanerit misissussallugit ulluinnaat toqqissinartut qulakkeerniarlugit”.

Suliat aallartinneqartut ilaat tassaapput angajoqqaanik pikkorissaaneq, atornerluisunik katsorsaaneq, qimarnguimmik pilersitsineq aamma inersimasunik meeraallutik kinguaasiutitigut atornerlugaasimanerminnik kingunerlutitsisunik sullissineq. Tamakkua saniatigut kommunip susassaqartitsiniarnerinut tapiissuteqartoqarpoq, tamatumunnga ilanngullugit suliat pikkorissaanerillu, meeqqanut eqqugaaqqajaasunut angajoqqaanullu sammitinneqartut.

Tasiilami iliuusissanut periarfissaat annertusarniarlugit, misissuilluni suliaq maanna aallartissaaq Kommuneqarfik Sermersooq qanimut suleqatigalugu, tassunga atatillugu pingaartinneqassaaq susassaqarfiit akimorlugit ilinniartitaanikkut, kulturikkut, inuussutissarsiornikkut aamma inunnik isumaginninnikkut nunap immikkoortuani ineriartortitsinissaq.

Ilaatigut misissorneqassapput naapertuuttumik nunap immikkoortuani atuuttussamik Tasiilami ilinniarfimmik pilersitsinissamut periarfissat. Aammattaaq pilersaarutigineqarpoq angutit naapittarfissaannik pilersitsinissaq, sumiiffimmilu atorfilinnik, eqqugaasunik sullissisartunik ilinniakkatigut qaffassaanermut periarfissiinissat.

Iliuuseqarnissaq kulturikkut suliniummik ilaqartinneqassaaq imminut toquttarnerit pinaveersaartinnissaat anguniarlugu isiginnaartitsinertut ilusilikkamik, aamma Tasiilami inuutissarsiutinik inerisaanermi, suliffissaqartitsiniarnermi piginnaanngorsaanermilu immikkut suliniutit qitiutinneqassapput.

Annerusumik paasissutissanik piniarfigineqarsinnaavoq Naalakkersuisup allattaa Rosa Thorsen, rosat@nanoq.gl
+299 34 57 02