Tuttunniarnissamut piffissaliussat tuttutassiissutillu – Ukiuunerani 2017

Aalisarnermut Piniarnermullu Naalakkersuisoqarfik ukiuunerani 2017-imi tuttunniarneq pillugu 13. februaarimi 2017-imi WWF-imiit isornartorsiorneqareerluni imatut oqaaseqaateqarniarpoq.

Ukiuunerani 2017-imi tuttunniarnissaq pillugu siunnersuutit piffissami 13. maajimiit 2017-imi 17. juuni ilanngullugu APN-imit tamanut tusarniaassutigineqarput. Siunnersuutit tusarniutigineqartut ilaatigut inuussutissarsiutigalugu piniartunut piniarfinni makkunani ukiuunerani piffissami killilikkami tuttunniarnissamik imaqarput:

Piniarfik 1 – Naternaq – tuttutassiissutit 100-iullutik.
Piniarfik 2 -         Sisimiut-Kangerlussuaq – tuttutassiissutit killeqaratik.
Piniarfik 4 – Ameralik – tuttutassiissutit 100-iullutik.
Piniarfik 5 – Qeqertarsuatsiaat – tuttutassiissutit 100-iullutik.
Piniarfik 6 – Qassit – tuttutassiissutit 100-iullutik.
Piniarfik 7 – Neria – tuttutassiissutit 100-iullutik.
Piniarfik 8 – Nuussuaq – tuttutassiissutit 100-iullutik.

Ukiuunerani tuttunniarneq piniarfinni pineqartuni tamani piffissami killilikkami ingerlassaaq tassalu 18. februaarimiit 2017-imi 10. martsi ilanngullugu – tassa sapaatip akunneri pingasut – sapaatillu akunnerini tallimani tamanut tusarniutigineqareerluni taamani Piniarnermut Naalakkersuisumit 3. juulimi 2016-imi aalajangerneqarput.

Piniarnermut Naalakkersuisoq nutaaq aalajangerpoq Piniarfimmi “Akia-Maniitsoq”-mi ukiuunerani killilikkamik tuttunniartoqassasoq tassanilu tuttutassiissutit 150-iullutik. Tamanna politikkikkut aalajangiineruvoq NAPP-miit qinnuteqaammi KNAPK-mit taperserneqartumi tunngaveqartumik nalileeqqinnermi. Ilutigalugu Piniarfik 4-mi aamma Piniarfik 5-imi tuttutassiissutit 100-imiit 150-inut qaffanneqarput.

Aalajangerneq piniarneq aallaaniarnerlu inatsisip § 2-ni piniartut ilisimasaannik aalajangiiniarnermi ilanngussisussaanermik tunngaveqarpoq 

Ilisimatitsissutigineqarsinnaavoq Piniarfik 2-mi piffissami 1. februaarimiit 15. martsi tungaanut sivisunerusumik ukiuunerani tuttunniarnissaq pillugu SAPP-miit qinnuteqaat KNAPK-mit aamma taperserneqartoq APN-imiit itigartitsissutigineqarmat. Taamaammat piniarfinni pineqartuni ukiuunerani tuttunniarneq sapaatip akunnerinik pingasunik sivisussusilik pineqarpoq tamannaavorlu Pinngortitaleriffik malillugu ukiuunerani tuttunniarnissap sivisunerpaaffigisinnaasaa.

Paasissutissat sukumiinerusut pillugit Immikkoortortami pisortaq Amalie Jessen attavigineqarsinnaavoq, oqarasuaatikkut 34 53 04, E-mail: amalie@nanoq.gl