Piniarnissamut piffissaliussat aamma Tuttutassiissutit Umimmattassiissutillu – Ukiuunerani 2017

Matumuuna ukiuunerani 2017-imi piniarnissamut piffissaliussat, tuttutassiissutit kiisalu umimmattassiissutit annikitsumik 15. December 2016-imi nalunaarutigineqartumiit nalimmassakkat nalunaarutigineqarput. 

Tuttut 

1. Piniarfik 2 (Sisimiut-Kangerlussuaq): Ukiuunerani piffissami februaarip 18-ianiit martsip qulingat ilanngullugu killeqanngitsumik inuussutissarsiutigalugu tuttunniarnissaq.   

2. Piniarfik 1 (Naternaq), Piniarfik 6 (Qassit), Piniarfik 7 (Neria) kiisalu Piniarfik 8 (Nuussuaq): Piniarfinni pineqartuni tamani ukiuunerani piffissami februaarip 18-ianiit martsip qulingat ilanngullugu inuussutissarsiutigalugu tuttunniarnissamut tuttunik 100-nik pisassiisoqarpoq. 

3. Piniarfik 3 (Akia-Maniitsoq), Piniarfik 4 (Ameralik) amma Piniarfik 5 (Qeqertarsuatsiaat): Piniarfinni pineqartuni tamani ukiuunerani piffissami februaarip 18-ianiit martsip qulingat ilanngullugu inuussutissarsiutigalugu tuttunniarnissamut tuttunik 150-nik pisassiisoqarpoq.   

Tunngavilersuutit: 

Piniarfik 2-mi (Sisimiut-Kangerlussuaq) tuttut ikilisarniarlugit ukiuunerani sapaatip akunnerini pingasuni killeqanngitsumik inuussutissarsiutigalugu tuttunniartoqassaaq, imm. 1 takuuk. Naalakkersuisup kissaataa malillugu Piniarfimmi 1-mi, 3-mi, 4-mi, 5-imi, 6-imi, 7-imi kiisalu 8-mi inuussutissarsiutigalugu piniartut ukiuunerani killilimmik tuttutassinneqarput, imm. 2 aama 3 takuuk. 

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat tuttunik malersuinermi piniutigissallugilluunniit inerteqqutaammata. 

Umimmaat 

4. Aqutsiveqarfik Maniitsoq: Piniarfik 2-mi Kangerlussuup kujataata-kangianiittumi ukiuunerani 2017-imi inuussutissarsiutigalugu umimmanniarneq januaarip 22-iat aallarnerfigalugu ammaqqinneqarpoq februaarip sisamaat ilanngullugu ingerlalluni.  Piniarfik 2-mi umimmattassiissutit 400-iupput. Piniarfik 3-mi ukiuunerani 2017-mi inuussutissarsiutigalugu umimmanniarneq januaarip qulingat aallarnerfigalugu aallartippoq martsip 10-at ilanngullugu ingerlassalluni, peqataaffigineqarluni Qeqqata Kommunianiit aamma Kommuneqarfik Sermersuumiit. Piniarfik 3-mi umimmattassiissutit 800-iupput aamma piniartunut Nuummeersut ataasiakkaanut 20-it. Piffissami januaarip qulinganiit martsip qulingat ilanngullugu ukiuunerani inuussutissarsiutigalugu aamma sunngiffimmi umimmanniarneq Piniarfik 1-imi ingerlavoq tassanilu motoorilinnik ingerlaartoqaqqusaanani. 

5. Aqutsiveqarfik Sisimiut: Ukiuunerani umimmanniarneq matoqqatinneqarpoq. 

6. Aqutsiveqarfik Ivittuut: Ukiuunerani umimmanniarneq matoqqatinneqarpoq. 

7. Aqutsiveqarfik Ittoqqortoormiit: Ukiuunerani 2017-imi inuussutissarsiutigalugu aamma sunngiffimmi umimmanniarneq martsi naallugu ingerlassaaq tassanilu 2016-imut ukiuuneranilu 2017-imut umimmattassiisutinit sinneruttut pineqarlutik. 

Tunngavilersuutit: 

Kangerlussuup eqqaani Piniarfik 2-mi ukiuunerani 2016-imi minnerpaaffiliinikkut kisitsereernerup kingorna ukiuunerani 2017-imi inuussutissarsiutigalugu umimmanniarneq killilimmik ammaqqinneqarpoq pissutigalugu umimmaat piniarfimmut pineqartumut uteqqilereermata. Kangerlussuup eqqaani Piniarfik 3-mi ukiuunerani 2017-imi 800-nik umimmattassiisoqarpoq pissutigalugu ukiuni arlaqartuni ukiuunerani killeqanngitsumik piniarneqartarnerat umimmaqatigiinnut sunniuteqarpallaaqimmat, imm. 4 takuuk.  

Sisimiut aqutsiveqarfiani umimmaat sinneruttut ikippallaalernerat pissutigalugu ukiuunerani umimmanniarneq matoqqatinneqarpoq, imm. 4 takuuk. Ivittuut aqutsiveqarfiani ukiuunerani umimmanniarneq matoqqatinneqarpoq kulavaat naartusut eqqissisimatinniarlugit taamaaliornikkullu norraat amerlisinniarlugit, imm. 5 takuuk. 

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat umimmannik malersuinermi piniutigissallugilluunniit inerteqqutaammata. Qamuteralaat, ATV-t kiisalu qulimiguullit atorlugit umimmannik ungoorinissaq APNN-imut qinnutigineqarsinnaavoq. Sunngiffimmi piniarnermut allagartap 1. maaji sioqqullugu akilereersimanissaa pillugu piumasaqaat atuutinneqarpoq taamatullu sunngiffimmi piniarnermut akuersissutit inunnut Kalaallit Nunaanni najugalittut inuit nalunaarsorsimaffiannut nalunaarne-qarsimasunut ukiunilu qaangiuttuni marlunni nalunaarsorneqareersimasunut taamaallaat tunniunneqarsinnaanerat pillugu piumasaqaat atuutinneqarluni. 

Ilanngussaq 1: Nunap immikkoortuini piniarnissamut piffissaliussat pisassiissutillu. 

Ilanngussaq 2: Kalaallit Nunaanni tuttunut Piniarfik 1-11. 

Ilanngussaq 3: Kalaallit Nunaanni umimmaqatigiit aqutsiveqarfiillu. 

Ilanngussaq 4: Maniitsup aqutsiveqarfiani umimmannut Piniarfik 1, 2 aamma 3.


Paasissutissat sukumiinerusut pillugit attavigiuk:

Immikkoortortami pisortaq Amalie Jessen
E-mail: amalie@nanoq.gl
Oqarasuaat; 34 53 04