Ukiuni marlunni ilinniagaqalernissamut piareersaataasumik ilinniagaq inersimasunut saaffiginnissutaasoq

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup (IKIIN) august 2017-imi Aasianni GUX-imi ukiuni marlunni ilinniagaqalernissamut piareersaataasumik ilinniagaq misiliutitut aallarnisalerpaa.

Ilinniagaq inersimasunut minnerpaamik 23-nik ukiulinnut, naapertuuttumik inuutissarsiummik ilinniagalinnut Nunatsinnilu nunaniluunniit allani ingerlaqqiffiusumik ilinniaqqinnissaminnik pisariaqartitsisunut saaffiginnippoq.

”Ilinniakkap inersimasut inersimasunik allanik peqateqarlutik ilinniarusuttut, ukiunilu pingasuni GUX-ernermit pilertornerusumik ingerlaqqiffiusumik ilinniagaqalernissamut aqqutissarserusuttut pisariaqartitaat naaperiarpai”, Doris Jakobsen oqarpoq.

Taamaattoq ukiuni marlunni ilinniagaqarnissamut periarfissaq taanna ukiuni pingasuni ilinniarnertut annertutiginngilaq, taamaalillunilu toqqaannartumik ilinniaqqinnissamut periarfissat ukiuni pingasuni GUX-ersimasut periarfissaannit ikinnerussallutik.

Ilinniagaq Kalaallit Nunaanni ingerlaqqiffiusumik ilinniakkani arlalinni ilinnialissutaasinnaassaaq, soorlu peqqissaasunngorniarluni ilinniartitsisunngorniarlunilu ilinniakkani. Ilinniagaqarniartut suli maluginiartuassavaat, ingerlaqqiffiusumik ilinniakkat ilaat karakteerit agguaqatigiissinnerinut tunngatillugu imaluunniit ilinniartitsissutit immikkut ittut pillugit piumasaqaateqarfiummata.
   
Ukiuni marlunni ilinniagaqalernissamut piareersaatasumik ilinniakkap, inersimasut siusinnerusukkut ukioq ataaseq ilinniartarnerat taarsissavaa, ilaatigullu allaassutigalugu qaffasissumik ilinniartitsineq ilinniartitsissutillu marloriaammik annertunerussammata.

Ilinnialernissamut piumasaqaatit ilaattut taaneqarsinnaavoq, minnerpaamik ukiuni marlunni inuutissarsiummik piffissaq tamaat suliffigalugu misilittagaqarnissaq. Ilinnialernissamut piumasaqaatit tamarmiusut Sunngu.gl -imi takuneqarsinnaapput.

Ilinniagaq ilinniagaqarnersiuteqarfiusinnaavoq.

Ilinnialerumalluni qinnuteqarneq ilitsersorneqarnerlu Majoriaq aqqutigalugu pissaaq kingusinnerpaamik 1. marts.

Sukumiinerusumik paasisaqarusuttut naalakkersuisup allattaa Rosa Thorsen attavigisinnaavaat, oqarsuaatikkut: +299 34 57 02-imut sianerlutik, imaluunniit e-mailikkut: rosat@nanoq.gl