Nunat avannarliit suleqatigiinnermut ministerii ukioq manna ataatsimiinnermi siullermi naapipput

Ulloq 9. februar Oslomi Nunat avannarliit suleqatigiinnermut ministerii ukioq manna ataatsimiinnermi siullermi naapipput

Peqqissutsimut Nunallu Avannarliit Suleqatigiinnerannut Naalakkersuisoq Agathe Fontain, ukioq manna ulloq 9. februar Oslomi ministerit ataatsimiinnerannut siullermut peqataavoq.

Norgep 2017-imi siulittaasuunermini suleqatigiinnermut pilersaarummi Nunat avannarliit EU-llu suleqatigiinnerat sallinngortissimavaa. Nunat avannarliit politikkikkut pitsaanerusumik EU-p suleqatiginissaanut periarfissaqarput. Tassunga ilanngunneqassaaq EU-p malitassai nunani tamalaani naammassineqassappata Nunat avannarliit suleqatigiinnermik pitsaasumik pisariaqartitsissammata, suleqatigiinnikkut Nunanut avannarlernut nutaanik killiliisumik EU inatsisitigut sukaterinissaa pinaveersaartinneqarsinnaammat.

Nunat avannarliit suleqatigiinnerat Kalaallit Nunaata nunanut allanut politikkiani pissusissamisoortuusoq, kiisalu nunat avannarliit Europap suleqatiginissaa pillugu oqaloqatigiinnissamik Kalaallit Nunaat peqataanissamut soqutiginnittoq, Naalakkersuisup Agathe Fontainip ataatsimiinnermi erseqqissarpaa. Kalaallit Nunaat suliani puisit amiinik tuniniaanermut tunngasuni Nunanit avannarlerniit tapersersorneqarnermik pitsaasumik misilittagaqarpoq, aamma EU nutaanik malittarisassaqartitsissaaq Kalaallit Nunaata inatsisitigut inissisimanerani sumiiffinnik sunniisunik.

Apeqqutit EU-mut tunngasut ministerit siunnersuisoqatigiit ataasiakkaat ullormut oqaluuserisassaanni eqqartorneqartarnissaat pingaaruteqartoq ataatsimiinnermi isumaqatigiissutigineqarpoq.

Nunat Avannarlerni Ministerit Siunnersuisoqatigiit 2018-imut missingersuutaat suleqatigiinnermut ministerit ataatsimiinnermi akueraat. Taamatuttaaq Nunani Avannarlerni Ministerit Siunnersuisoqatigiit Issittumi Suleqatigiinnissamut Pilersaarutip nutarternissaanut suliaq ingerlanneqartoq oqallisigineqarpoq.

"Kalaallit Nunaat suleqataanikkut siunnersuisooqatigiillu arlallit aqqutigalugit nunat avannarliit suleqatigiinnerannut eqqummaarittumik peqataavoq, aamma issittumi suliniutit Issittumi Siunnersuisoqatigiinni sulinerup piareersarnissaanut annertuumik sunniuteqartussaapput" Naalakkersuisoq Agathe Fontain oqarpoq.

Immap naqqani uumasut assigiinngisitaartuunerat pillugu siulittaasuunermi  Pinngortitaleriffimmiit suliniut ukiuni makkunani Tunumi misissorneqartut pillugit ataatsimiinnermi aamma ilisimatitsissutigisinnaasimavakka. Kalaallit Nunaanni Pinngortitamik aqutsisoqarfik Aalisarnermut Piniarnermullu Naalakkersuisoqarfiup ataaniittoq pillugu suliniummut peqatigitillugu suliniutit taakku nunat avannarliit suleqatigiinnerisigut taamaallaat ilisimatitsissutiginissaat periarfissaqarsimavoq" taama naggasiivoq Agathe Fontain.

Paasissutissat sukumiinerusut Naalakkersuisup allattaa Nauja Møller oqarasuaatikkut: +299 58 26 54 imal. e-mailikkut: nmoe@nanoq.gl aamma Siunnersortimut Jørgen S. Søndergaardimut oqarasuaatikkut +45 32833838 imal. e-mailikkut: jss@ghsdk.dk attaveqarluni pissarsiarineqarsinnaapput.


Saamerlerniit, Ambassadøri, Krister Bringéus (Sverige), Nunat Avannarliit siunnersuisooqatigiivisa Generalsekretæria, Dagfinn Høybråten (Norge), Nunat Avannarliit suleqatigiinnerannut ministeriunerat, Frank Bakke-Jensen (Norge), Peqqissutsimut Nunallu Avannarliit Suleqatigiinnerannut Naalakkersuisoq, Agathe Fontain, Nunat Avannarliit suleqatigiinnerannut ministeri, Nina Fellman (Åland), Nunat Avannarliit suleqatigiinnerannut ministeri, Karen Ellemann (Danmark), Nunat Avannarliit suleqatigiinnerannut ministeri, Kristján Þór Júlíusson (Island), Nunat Avannarliit suleqatigiinnerannut ministeri, Anne Berner (Finland).