Naalakkersuisut Kalaallit Nunaata Københavnimi Sinniisoqarfiani ukiortaami ilasseqatigiissitsinerat

Naalakkersuisut siulittaasuat Kim Kielsen Naalakkersuisut Kalaallit Nunaata Københavnimi Sinniisoqarfiani ukiortaami ilasseqatigiissitsivoq sisiamanngornermi januaarip aqqaneq aappaanni 2017-imi.

Ukiortaami ilasseqatigiissitsineq marlunngorlugu avinneqarsimavoq, siulleq naalakkersuisunut, naalagaaffinni nunanut allanut attaveqartitsisartunut suleqatigisartakkanullu, aappaa Nunatsinnut ikinngutinut.

Naalakkersuisut siulittaasuata Kim Kielsenip tikilluaqqusilluni oqaaseqanermini ilaatigut ima oqarpoq:

"Alloriarnikkaarlugit Kalaallit Nunaata namminersulivinnissaa sulissutigivarput. Nunatta nunarsuatsinni tamakkiisumik naligiittullu akuulernissaa siunertaavoq. Piareersarnermut tunngaviusumik inatsisiliornissamut isumalioqatigiissitamik ukioq manna pilersitsinissaq ilaavoq. Namminersulivinnissarli ullumi aqaguluunniit pinavianngilaq. Ilaqarpugut qaqugu namminersulivinnissamik ulluleerusuttunik. Uangaanngitsoq. Nunatta ilinniartitaanikkut, isumaginninnikkut aningaasaqarnikkullu kivinnissaanut piffissaq pisariaqartoq atorneqaqqaassaaq. Tamanna pereerpat nunatta siunissaa pillugu meeqqagut ernuttagullu aalajangernissamut tunngavissaqalersimassapput."

Tikilluaqqusilluni oqalugiaat

Ukiortaami ilasseqatigiinnermit assilisat

 

Annertunerusumik paasissutissanik piumaguit Tusagassiivimmi pisortaq Paornánguaq Kleist attavigineqarsinnaavoq mobilikkut +45 31 70 42 67 imalt. e-mail-ikkut: paok@nanoq.gl.