Naalakkersuisut Hudson Greenland A/S-imut piiaanissamut akuersissut akueraat

Ullumi ataatsimiinnerminni Naalakkersuisut Hudson Greenland A/S-imut (Hudson) piiaanissamut akuersissut akuersissuteqarfigaat. Peqatigisaanik Naalakkersuisut IBA-mut isumaqatigiissut Namminersorlutik Oqartussat, Qeqqata Kommuniata aamma Hudson-ip akornanni isumaqatigiissutigineqartoq akuersissuteqarfigaat. 

Piiaanissamut akuersissutip kiisalu IBA-mut isumaqatigiissutip akuersissuteqarfigineqarnissaannut tunngavissarititaasutut, ullumi ataatsimiinnermi taamatuttaaq Hudson-ip VVM-imut (Avatangiisinut sunniutaasussanik nalilersuineq) aamma VSB-imut (Inuiaqatigiinni piujuartussatut iluaqutaasumik sunniutaasussanik nalilersuineq) nassuiaasiai inaarutaasut Naalakkersuisut akueraat. VVM-imut nassuiaat aamma VSB-imut nassuiaat 2015-imi ulloq 22. martsimiit 2015-imi ulloq 29. maj tikillugu tamanut ammasumik tusarniaassutigineqarput aammalu tusarniaanermut akissuteqaatit tamarmik tamakkiisunngorlugit Namminersorlutik Oqartussat pisortatigoortumik tusarniaanermut nittartagaanni nassaarineqarsinnaapput.

Sumiiffimmi Naajat-nik taaneqartartumi 96 km2-itut annertussuseqartumi, Sisimiut aamma Kangerlussuup akornanni Qeqqata Kommuniani Qaqortorsuup eqqaani inissisimasumi aatsitassamik anorthosit-imik piiaanissamik qinnuteqaammik Hudson 2015-imi martsimi tunniussivoq. 

”Hudson-ip suliassaa kalaallit oqartussaasuisa, ilanngullugit Qeqqata Kommunia aamma aatsitassanut oqartussaasoq, aatsitassarsiornermik suliaqartunik sunniuteqarluartumik suleqateqarsinnaanerannut aammalu ataatsimoorluni aaqqiissutissarsisoqarsinnaaneranut, assersuutissaalluarpoq. Suleqatigiinnermut pitsaasumut sunniuteqarluartumullu tunngavissarititaasoq tassaasimavoq qinnuteqaammut killissaliussat ersarissuussasut paasiuminartuussasullu. Taamatuttaaq Hudson-ip soorunami nammineq suliassani suliarilluarsimavai aammalu inuiaqatigiit piumasaqaatai naammassisimallugit”. Oqarpoq Aningaasaqarnermut Aatsitassanullu Naalakkersuisoq Andreas Uldum. 

Sanaartornermut immikkoortumi, ukiup ataatsip missaanik sivisussuseqartussatut naatsorsuutigineqartumi, inuit 20-it sulisussatut pisariaqartinneqassasut naatsorsuutigineqarpoq, taakkua affaasa missaat nunaqavissuussallutik. Ingerlatsinermut immikkoortumi ukiuni 20-ini aatsitassarsiorfiup maannamuugallartoq ingerlanneqarfissaatut pilersaarusiorfiusuni sulisussat 60-it missaat sulisussatut pisariaqartinneqassasut naatsorsuutigineqarpoq. Ingerlatsinermut immikkoortoq tamaat minnerpaamik 80 %-it nunaqavissunik sulisoqartinneqarnissaasa anguneqarnissaa siunnerfigineqarpoq. Aatsitassarsiorfimmi sulisussat saniatigut naatsorsuutigineqarpoq suliffeqarfinni najukkameersuni arlalinni, Hudson-ip ingerlataannut sullissisussani kiffartuussisussanilu, suliassaq suliffissaqartitsiviussasoq. 

Suliassami najukkamiititsinissaq Hudson-ip, Qeqqata Kommuniata aamma Naalakkersuisut akornanni IBA-mut isumaqatigiissummi isumaqatigiinninniutigineqareerpoq. Inuussutissarsiornermut, Suliffeqarnermut, Niuernermut Nunanullu Allanut Naalakkersuisup Vittus Qujaukitsup  IBA-imut isumaqatigiissummi qulequttat pingaarnerit qitiusut erseqqissarpai: ”Nunaqavissunik sulisoqarnissaq, suliffeqarfinnik najukkaneersunik akuutitsinissaq, ilanngullugit pilersuutissat, najukkami innuttaasut piginnaanngorsarneqarnissaasa ilinniartitaanerullu IBA-imut isumaqatigiissummi oqaluuserineqartuni qaffasissumi inissinneqarnissaasa aammaloortumik iluatsinnera nuannaarutigaara”. Aammattaaq Hudson IBA-mut isumaqatigiissut naapertorlugu inooqatigiinnermut kulturimullu aningaasaateqarfimmut aamma ilinniartitaanermut aningaasaateqarfimmut ukiumoortumik aningaasanik akiliuteqartassaaq.

Aatsitassarsiorfimmik suliaqarnermut aningaasaqarnikkut atugassarititaasut tassaapput aningaasarsianut akileraarutinik, ingerlatseqatigiiffiup akileraarutaanik aamma iluanaarutinut akileraarutinit sukkulluunniit atuuttunit akiliisitsisarnissaq. Tamatuma saniatigut royaltyp 2,5 %-iusup saffiugassamik tunisinermut atatillugu Naalakkersuisunit akilersinneqartartussap kingunerisaanik, suliassap iluanaaruteqarfiunera apeqqutaatinnagu, aatsitassarsiorfiup ingerlanneqarnerani ukiut tamaasa Namminersorlutik Oqartussanut aningaasanik minnerpaaffeqartunik Hudson akiliuteqartassaaq. 

Annertunerusunik paasissutissanik piniarnermi innersuussivigineqarpoq Aatsitassanut Ikummatissanullu Naalakkersuisoqarfimmi Naalakkersuisoqarfimmut pisortaagallartoq: Jørgen T. Hammeken-Holm, mobil 55 24 66, e-mail joeh@nanoq.gl

Pinngortitamut, Avatangiisinut Inatsisinillu Atuutsitsinermut Naalakkersuisoqarfimmi Naalakkersuisoqarfimmut pisortaq Mette Skarregaard Pedersen, tlf. 52 98 44, e-mail mesp@nanoq.gl, imaluunniit 

Inuussutissarsiornermut, Suliffeqarnermut Niuernermullu Naalakkersuisoqarfimmi Naalakkersuisoqarfimmut pisortaq Jørn Skov Nielsen, mobil 55 61 88, e-mail jsn@nanoq.gl.