Ilaqutariinnik siunnersuisarneq pillugu isumasioqatigiinnissaq

Ilaqutariinnermut Inatsisinillu Atuutsitsinermut Naalakkersuisoqarfik ilaqutariinnik kommunini siunnersuisarneq pillugu ulluni makkunani Nuummi isumaginninnermik suliaqartunut pisortaasunullu isumasioqatigiissitsileruttorpoq.

Isumasioqatigiinnerup siunertaraa ilaqutariinnik sanngiitsunik sullissinermi Ilaqutariinnik siunnersuisarnerup isumaginninnerup iluani sullissinermi sakkussatut ilisimaneqalernissaa siammarternissaalu.

Periuseq pineqartoq inissiinernut pinaveersaartinnissaannut, inissiisarnerit angerlartitsisarnermullu il.il. atatillugu atorneqartarpoq.

Taamatut periuseqarnikkut ilaqutariit ilisarisimasallu meeqqamut inuusuttumulluunniit siunissami pitsaanerpaamik aaqqiissutaanissaanut attuumassutilinnik piviusorsiortunillu siunnersuuteqarnissamut ilaatinneqarlutillu kaammattorneqartarput.

Tamatuma saniatigut periutsip atulernissaanut atorneranilu misilittakkanik paarlaaqatigiinnermik aaqqissuussisoqassaaq. Kommuneqarfik Sermersuumi periutsip piviusumik atornerani misilittakkat misigisimasallu saqqummiutissavai.

Isumasioqatigiinneq Hotel Hans Egedemi ulluni 14. – 17. oktober ingerlanneqassaaq.

Annertunerusumik paasisaqarusuttunut attavigineqarsinnaavoq:
Andu Schiødt Olsen
Mobil: 532607
e-mail: andu@nanoq.gl

 

Assii: Angu Motzfeldt