Ban Ki-moonip Kalaallit Nunaat nuimasut akorngannut qaaqquaa

Naalakkersuisoq for Miljø og Natur Kim Kielsen, generalsekretær Ban Ki-moon, Formand for Naalakkersuisut Aleqa Hammond

Naalagaaffiit Peqatigiit allattaanerat ukioq manna septemberip 23-ani sila pillugu ataatsimeersuartitsileruni Naalakkersuisut Siulittaasuat, Aleqa Hammond, oqalugiartussat akornanniissaaq. Tamanna qularnanngilluinnarpoq, allattaanerup Ilulissani Uummannamilu tikeraaqqammersup tikeraarnermi nalaani Aleqa Hammondimut toqqaannartumik qaaqqusineratigut.

Ban Ki-moonip nunatsinnut tikeraarnera tassaavoq Naalagaaffiit Peqatigiit septemberimi sila pillugu ataatsimeersuarnissaannut kissassaataasoq, ataatsimeersuarnissamilu tamatumani Naalagaaffiit Peqatigiit Sila pillugu Isumaqatigiissutaat tunngavigalugu nunat tamalaat akornanni sila pillugu isumaqatiginninniarnerit ikorfartorneqassapput. Isumaqatiginninniarnerit Parisimi 2015-imi nutaamik isumaqatigiissuteqarnermik kinguneqartussatut naatsorsuutigineqarput.

Uummannami allattaanerup tikeraarnermini nammineerluni piniartunik naapitsinerata qularutissaajunnaarsippaa, silap allanngoriartorneranik misilittakkavut tassaasinnaasut nunarsuarmi siuttunut ikioqqunermik iliuuseqarsinnaaqqortussuseqarnermillu maannakkoqqissaaq takutitsinissamik piumasaqaateqarfiusut.

“Pinngortitaq isumaqatiginninniarfigisinnaanngilarput. Pinngortitami ajunaarnerpassuit pereersimapput. Maannakkut iliuuseqarnissamut piffissanngorpoq”,

Ban Ki-moon oqarpoq.

Naak Ban Ki-moonip Uummannarmiunit kissalaartumik tikilluaqquneqarnini attortissutigigaluarlugu, allattaaneq Avannaaniinnermini isumakuluutissarsinerarpoq:

“Sermit iigartartut sermersuullu taama sukkatigisumik aakkiartornerat assorsuaq isumakuluutigaara. Tamatuma kingunerisaanik imaq qaffakkiartorpoq, tamannalu nunarsuarmioqatigiinnut tamanut sunniuteqarpoq.”

Oqaluttuat misilittakkallu oqaluttuarineqartut, Ban Ki-moon-ip Uummannamiinnermini pissarsiarisani, nalunaarutigineqarsimasut ikorfartuussutiginiarlugit oqariartuummut maannakkorpiaq piffissanngortoq 2015-imi sila pillugu nunarsuaq tamakkerlugu 2020-miit atuutilersussamik isumaqatigiissuteqarnissap tuaviuunneqarnissaa. Taamaasilluni allattaanerup Kalaallit Nunaanni tikeraarnera tassaavoq, nunarsuaq tamakkerlugu silaannaap kissassusiata agguaqatigiinnera grad-inik marlunnik sinnerlugu qaffannginnissaanik siammasissumik sila pillugu isumaqatigiissuteqarnissap qulakkeerneqarnissaanik allattaanerup tamaviaarutigaa.

Pingasunngornermi naggataarnersiorluni nereqatigiinnermi Aleqa Hammond-ip erseqqissarpaa, nammineerluni aamma inunngorfigisaminut tikeraarnini attortissutigalugu kiisalu septemberimi nunarsuarmi siuttut Kalaallit Nunaannit oqariartuuteqarfiginissaat qilanaarinerarlugu:

“Periarfissaq Issittumi nunap inoqqaavisa silap allanngornera pillugu misigisaat pillugit oqariartuuteqarnissamut immikkut illuinnarpoq, allattaanerullu nunamut nammineerluni Naalagaaffiit Peqatigiinnut ilaasortaanngitsumut oqaaseqarnissamut periarfissiinera immikkut illuinnarpoq”.

Tikeraat unnuat kingulleq naggataarnersiorluni nereqatigiinngilaattaani Avatangiisinut Pinngortitamullu Naalakkersuisoq, Kim Kielsen, Kalaallit Nunaata nukimmik ataavartumik pitsaasumik misilittagaqarnera pillugu saqqummiussivoq:

“Erngup nukinganut aningaasaliissuteqarnitsigut nammineerluta uuliamik atuinitta killilersimaarnissaa pimoorullugu iliuuseqarfigigipput erseqqissassallugu uannut assut pingaaruteqarsimavoq. Atortorissaarutit tungaasigut ineriartornerup siornigerneratigut
erngup nukinganik nukissiuuteqarnissamut periarfissatta annertuut atornissaanni aporfissat qaangertarpavut, isumaqarpungalu tamanna tulluusimaarutigisariaqarippugt.”

 

 

Aleqa Hammond                    Kim Kielsen  
Naalakkersuisut Siulittaasuat                   Avatangiisinut Pinngortitamullu Naalakkersuisoq

 

 

Fru Ban Ki-moon, statsminister Helle Thorning-Schmidt, generalsekretær Ban Ki-moon, Formand for Naalakkersuisut Aleqa Hammond

Ban Ki-moonip nulia, statsministeri Helle Thorning-Schmidt, Naalagaafiit Peqatigiit allattaanerat Ban Ki-moon, Naalakkersuisut Siulittaasuallu Aleqa Hammond