Steen Lynge Kujataanut tikeraarpoq

 

Peqqissutsimut Attaveqarnermullu Naalakkersuisoq Steen Lynge piffissami 2. - 6. decembari Kujataanut tikeraassaaq.

Illoqarfinni Narsami, Nanortalimi Qaqortumullu akunninnermini innuttaasunik ataatsimiisitsinernut Steen Lynge ataatsimiigiaqqusisassaaq, tassani naalakkersuinikkut anguniakkat aamma peqqinnissakkut attaveqarnikkullu tulleriissaarinerit saqqummiuttassavai.

Tamatuma saniatigut Narsarsuarmi, Narsami, Nanortalimmi Qaqortumilu peqqinnissaqarfimmi sulisut Steen Lyngep ataatsimeeqatigissavai.

Narsarsuarmi ilaatigut Sikunik Alapernaarsuiffiup aamma niuertarfeqarnermut siunnersuisoqatigiit ataatsimeeqatiginissat pilersaarutigineqarput.

Nanortalimmi niuertarfeqarnermut siunnersuisoqatigiinnik ataatsimeeqateqarnissaq isumaqatigiissutigineqarpoq, Qaqortumilu Kommune Kujallermi sinniisut Steen Lyngep ataatsimeeqatigissavai.

Ulloq 2. decembari Steen Lynge Narsarsuarmiissaaq. Ulloq 3. decembari angalaneq Narsamut ingerlaqqissaaq. Ulloq 4. decembari Steen Lynge Nanortalimmiissaaq angalanerlu ulluni 5. - 6. decembari Qaqortumi tikeraarnermik naggaserneqassaaq.