Niuernermik Ilinniarfik

”Qaqortumi Nuummilu niuernermik ilinniarfiit taakku kattunnissaat pillugu Kommune Kujallermi Borgmesterip Jørgen Wæver Johansenip aamma Niuernermik Ilinniarfimmi siulersuisut tusagassiuutini oqallinnerisa takutippaa ilinniartitsisarnerput soqutigineqartorujussuaq.

Soqutiginninneq taanna nuannaarutigisorujussuara, qilanaaralugulu – suliamut attuumassuteqartut oqaloqatigalugit, niuernermik ilinniagaqarnissamik kissaateqartut pitsaanerpaamik atugassaqartilernissaat”, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq oqarpoq, nangillunilu: ”Ilinniartitaanermut, Ilageeqarnermut, Kultureqarnermut Naligiissitaanermulu Naalakkersuisoqarfik ukiaq manna workshopinik ingerlatsivoq, taannakunanilu siunertaavoq Ilinniartitsinermut Pilersaarutissamut II-mut tapersiissutinik katersuinissaq. Taamaammat Qaqortumi niuernermik ilinniarfiit marluk kattunnissaat pillugu Kommune Kujallermit kinguneqartussamik iliuuseqarnissamik siunnersuuteqarneq Naalakkersuisut nuannaarutigaat, tamannalumi sinerissamik illoqarfinni ineriartortitsinerup annertusarnissaanik Naalakkersuisut kissaateqarnerannut naapertuulluarpoq.

Naalakkersuisut nalunaarutigisinnaavaat Ilinniartitsinermut Pilersaarummik II-mik suliaqarnermi ilinniarfiit annerusunngorlugit kattunnissaannik siunnersuutit arlallit ilaasut. Kattussinerit taakku piffissami sivikitsumi annertuunik angingaasartuuteqarneq kingunerissavaat, taamaalillunilu taakku piviusunngortinnissaannut Naalakkersuisut naggataatigullu ukiuni aggersuni aningaasanut inatsisini Inatsisartut suliniuterpassuarnik pitsaasunik tulleriinnilersuinerat apeqqutaassaaq.”

Ilinniartitsinermut pilersaarummi II-mi Ilinniartitsinermut Pilersaarut nangeqqinneqarpoq, taassumatulli siunertaalluni ilinniartitsinermi siunissami ineriartortitsinsisap sammivilerneqarnissaa. Ilinniartitsinermut Pilersaarut II maannakkut suliarineqarpoq, ilimagineqarporlu 2014-imi upernaakkut Inatsisartut ataatsimiinneranni suliarineqassasoq.