Aalisarsinnaanissamut akuersissuteqartarnermi 1.500 kr.-inik akiliuteqartitsisarneq Naalakkersuisut atorunnaarsippaat.

Stemningsbillede

Sinerissap qanittuani aalisarnermi atuisut akiliuteqartinneqartarnerisa atorunnaarsinnissaa Naalakkersuisut aalajangerpaat, taamaasilluni akiliummik 1.500 kr.-inik akiliuteqartit­sisarneq atorunnaarsinneqarluni. Aalisarnermut atatillugu atuisunut akiliuteqartitsineq pillugu Namminersornerullutik Oqartussat nalunaarutaat nr. 22, 21. december 2012-imeersumi aalajangersakkat tassunga tunngasut taamaasillutik atorunnaarsinneqarput kingumut 1. januar 2013-imiit atortussanngortinneqarluni.

 

Inuit 2013-imut atuisut akiliuteqarsimasut, akiliutigisimasaminnik utertitsisinnaanissaminnut periarfissaqarput. Akiliutigisimasat utertinneqarnissaat kissaatigineqarpat Aalisarnermut, Piniarnermut Nunalerinermullu Naalakkersuisoqarfimmut qinnuteqaateqartoqassaaq. Qinnuteqaammi allassimassaaq aalisarsinnaanissamut akuersissummik pigisaqartup aqqa, inuttut normu, akiliutigisimallu kontomut ikineqarnissaanut konto normu ikisiffissaq. Akiliutigisimasat utertinnissaannut piumasaqarneq 31. december 2013-ip tungaanut qinnutigineqarsinnaavoq. Piffissap taassuma kingorna utertitsisoqarnissaanik piumasaqartoqarsinnaassanngilaq.

Erseqqissaatigineqassaaq Inatsisartut Aningaasaqarnermut– aamma Akileraartarnermut Ataatsimiititaata ulloq 26. Juni 2013-imi ataatsimiinnermini amerlanerussuteqartut Naalakkersuisut qinnuteqaataat akuersissuteqarfigimmassuk.