Inuussutissarsiutinik siuarsaanermi ingerlatseqatigiiffiit

2012-imi ukiut nikinnerini nunarput inuussutissarsiutinik siuarsaanermi nutaamik aaqqissuussaqalerpoq. Inuussutissarsiortunut siunnersuineq ukunannga isumagineqarpoq:

Greenland Business

Greenland Businessip suliassaraa nalinginnaasumik inuussutissarsiortunut siunnersuinissaq aamma aallarnisaasunit isumassarsilluarsimasunit qinnuteqaatinik suliarinninneq, aningaasatigut tapiiffigineqarnissamik atorfissaqartitsisunik imaluunniit nutaaliornermi isumassarsiat pilersaarutinut piviusunut atasinnaasunullu pilersinneqarnissaannut ilitsersuunneqarnissamik atorfissaqartitsisunut. Tamannarpiaq pissutigalugu Namminersorlutik Oqartussat inuussutissarsiutinik siuarsaanerat Greenland Bussinessimit aqunneqarput.

Taakku saniatigut EU-p suliniutaanik, nunatsinnit qinnutigineqarsinnaasunik peqataaffigineqarsinnaasunillu Greenland Bussiness nakkutilliinissamik suliaqarpoq.
Tassunga atatillugu suliffeqarfiit, suleqatigiiffiit pisortallu suliffeqarfii peqataanissamut soqutiginnittut Greenland Bussinessimit siunnersorneqartarput – aamma qinnuteqaatit annertuut immersorneqarnialeraangata pitsaasunik siunnersuuteqarnikkut ikiuuttarlutik.

Greenland Venture

Greenland Venture nunatsinni suliffeqarfinnut, annertuumik aningaasaliinissamut aningaasaatinik annaaneqaratarsinnaasunik taarsigassarsinissamik pisariaqartitsisunut qularnaveeqqusiisarpoq.
Taakku saniatigut suliffeqarfinnut pilersaarutinullu, pitsaasumik ineriartornissamut periarfissaqartunut, aamma periarfissat taakku iluaqutigisinnaajumallugit piviusunngortissinnaajumallugillu, aningaasaatinik pilersorneqarnissamik pisariaqartitsisunut Greenland Venture siunnersuillunilu aningaasaliisarpoq.

Visit Greenland

Visit Greenlandip suliassaa tassaavoq nunatsinni takornariaqarnikkut misigisaqarnikkullu inuussutissarsiutinik inerisaanissaq.
Visit Greenland tassaavoq nunatta takornariaqarnikkut siunnersuisoqatigiivi, nunatsinni takornariaqarnikkut assigiinngitsunik inerisaasussaq, soorlu pissanganartumik takornariarnermiit takornariartaatinut umiarsuarnut ingerlataqarnikkut siuarsaasut.

Aatsitassanut tunngasutigut siunnersuineq

Aatsitassarsiorneq siunissatsinni ineriartortitsinermi sukarsuit ilagaat. Suliffeqarfiit sulisartullu nunatsinneersut peqataatinneqarnissaat anguniarlugu ukiuni 2012-imi aamma 2013-imi Kalaallit Nunaanni suliffeqarfinnut sammisunik assigiinngitsunik pikkorissaanerit ingerlanneqarput. Taamatut pikkorissaalluni sulinerit 2014-imi aamma 2015-imi ingerlateqqinneqassapput, suliffeqarfinnut aatsitassarsiortunut sullissinissaminnut soqutiginnittunut aalajangersimasunik neqerooruteqartoqartassalluni. Sillimaniarneq aamma allagartaqalersitsisumik pikkorissaanerit sammineqassapput. Taakku marluk tassaapput aatsitassarsiortunut sullissiniartut iluatsittumik angusaqarnissaannut neqeroorutit qitiulluinnartussat, aatsitassarsiortunut sullissinerup saniatigut allatut aamma pingaaruteqartut.

Inuussutissarsiutinik ingerlatsisunut neqeroorut pitsaasoq. Suliaq suliariumannittussarsiuussinerup kingorna Greenland Petroleum Services A/Simit suleqataanniillu Kisserup International Trade Rootsimit aamma Copenhagen Groupimit isumagineqassaaq. Pikkorissaanernut pilersaarut pillugu aviisi atuaruk. 

Ukua aamma takukkit: www.suppliers.gl aamma www.facebook.com/suppliersgreenland