Ilinniartumik suliffimmik misiliisussarsiorpoq

KALAALLIT NUNAATA WASHINGTON, D.C.-IMI SINNIISOQARFIANI SULIFFIMMIK MISILIISUSSARSIORNERANIK ALLAGARSIUSSAQ

 Kalaallit Nunaata Washington-imi Sinniisoqarfia ilinniartumik suliffimmik misiliisussarsiorpoq

 

 

Suliffik misiliiffik

Washington, D.C.-imi Kalaallit Nunaata Sinniisoqarfia

Suliffimmik misiliinerup sivisussusia

 

1. august 2018 - 31. januar 2019.

Sapaatip akunneranut akunnerit 37-t sulisoqartarpoq.

Inissisimaffia sinniisoqarfimmiippoq

 

Washington, D.C.-mi Kalaallit Nunaata Sinniisoqarfia 2014-imi pilersinneqarpoq Danskillu Aallartitaqarfiata illutaani inissisimavoq. Sinniisoqarfik maannakkut aallartitaalluni Sinniisoqarfimmi Pisortamik aamma Aallartitaqarfimmi allatsimik inuttaqartinneqarpoq. 2018-ip ingerlanerani sulisut allatsimik najugaqavissumik ilaneqassapput.

 

Suliffimmik misiliisoq sinniisoqarfimmiissaaq allaffillu ukuninnga ikiortassallugu: paasissutissanik ujarlerneq suliaqarnerlu, mailit, allakkat nutaarsiassat, suleqatigisat ataatsimeeqatigisat ingiallorlugit, allakkianik nalunaarutiginninnernillu suliaqarneq, nittartakkap nutarternera, suliassat isumagineqartartussat nalinginnaasullu.

Suliassaqarfiit suliffimmik misiliininni ilisimasaqarfigilersinnaasatit

 

Washington, D.C.-imi Kalaallit Nunaata Sinniisoqarfia Kalaallit Nunaata aamma USA-p akornanni suleqatigiinneq pillugu suleqatigiissutai nukittorsaaviginiarlugit: Politikkikkut, aningaasaqarnikkut, niuernikkut, ilinniartitaanikkut, ilisimatusarnikkut kulturikkullu assigiinngitsutigut sulissuteqarpoq. Aammattaaq Sinniisoqarfimmi pisortaq Canadami pisussaaffilerneqarpoq. Taamaattumik Sinniisoqarfik aamma kalaallit Canadamiullu assigiinngitsutigut attaveqaqatigiinnerisa nukittorsaavigineqarnissaannut suliaqarluni.   

 

Issittoq pillugu eqqartuineq USA-mi soqutigineqarnera ukiuni kingullerni annertusiartorsimavoq. Kalaallit Nunaata EU-llu isumaqatigiissutai Bruxellesimi Sinniisoqarfiup isumagisarpai USA-lli Canadallu akornanni isumaqatigiissuteqarani, taamaammat maannamut Washingtonimi Sinniisoqarfiup suliassaa pingaarneq tassaavoq Kalaallit Nunaata saqquminerutinneqarnissaa aammattaaq USA-p Canadallu suleqatiginissaannut periarfissat erseqqissarnissai, taakku Amerikap nunavittaata avannarliup, niuernermut tunngavillit, kultureqarnermut ilisimatusarnermullu soqutiginaateqarsinnaasunik Kalaallit Nunaannut iluaqutissanngortinneqarsinnaappata. Suliffimmi misiliinermut tunngatillugu Amerikamiut politikkikkut ingerlanerat taavalu USA-p Issittoq pillugu politikkia qitiutinneqarput.

 

Suliami tassani suliffimmi misiliisup siunnersorti ilagalugu peqataanissaa naatsorsuutigineqarpoq, tassunga ilanngullugu aaqqissuussinernut ataatsimiinnernullu sinniisoqarfimmi sulisut allat peqatigalugit allakkiussalluni tamatumalu kingorna Nunanut Allanut Pisortaqarfimmut nalunaaruteqassalluni. Tamatuma saniatigut suliassat ilagivaat paasissutissanik katersineq suliarinninnerlu nalunaarusianit assigiinngitsuniit, tusagassiuutiniit internetimiillu siunertaralugu Sinniisoqarfiup allakkat nutaarsiassaataasa allannissai tassa suliffimmik misiliisup allannissaanut isumagisassai.

 

Kiisalu sinniisoqarfik sulianik allanik isumaginnittarpoq soorlu matumani pissutsit, tassunga ilanngullugit Kalaallit Nunaanni pissutsit pillugit Amerika Avannarlermi paasissutissiisarneq; Kalallit Nunaannit tikeraartinut ikiuuttarneq soorlu suliffinnik aamma suliffeqarfinnik aaqqissuussinermi suleqateqarnissamik pilersitsinissamut tunngasunik kissaateqarnernut tunngasunut ikiuuttarluni il.il. Aammattaaq Naalakkersuisunut, Inatsisartunut qitiusumillu allaffeqarfimmut suliassanik naleqqunnerpaanik Washingtonimi imaluunniit Washingtonimiit aaqqinneqartussanik isumaginninnermigut kiffartuussisarluni.

 

Suliffimmik misiliinerup siunertaa

 

Matumani ilinniarnermut atatillugu suliffimmik misiliineq pineqarpoq. Suliffimmik misiliineq ilinniartup ilinniarneranut iluaqutaassaaq, imatullu aaqqissuunneqassalluni ilinniarfiup pineqartoq akuerippagu angusimasanik ilinniarnermut allamut nuussinissaq (meritoverførsel) qulakkeerneqassalluni.

Suliffimmik misiliinnginnermi ilinniarfiit isumaqatigiissuteqarfigeqqaartariaqarpat point-inik ECTS-iusunik nuussisinnaanersutit imaluunniit allatut ilinniakkamut tunngasumut suliffimmik misiliinermut akuerineqarnissannut.

Suliffimmik misiliisumut naatsorsuutigisat

Inuiaqatigiinnik ilisimatusarnermi ingerlaqqiffiusumik ilinniartuuneq, soorlu ukununnga: cand. jur., cand.scient.pol, cand.oecon, cand.polit., cand.merc.jur imaluunniit bachelor.

 

-          Kalaallit Nunaata nunanut allanut naalakkersuinikkut atassuteqarneranik soqutigisaqartuuneq paasisimasaqartuunerlu.

-          Kalaallisut, qallunaatut tuluttullu allattariarsornermik oqaluttariarsornermillu  piginnaaneqarluarneq.

-          Tunuarsimaartuunnginneq nammineersinnaaneq sulissuteqarusussuseqartuunerlu.

-          Ammasuuneq suleqatigiinnissamik pingaartitsisuuneq ilinniarumassuseqarnerlu.

-          MS Office pakke-mik nalinginnaasumik atuisinnaaneq piumasaqaataavoq, inoqatinut attaveqaatinik atuisinnaaneq nittartakkanillu aaqqissuussinermik ilisimasaqarneq iluaqutaassaaq.

 

Suliffimmik misiliinermut piumasaqaatit

 

 

Suliffimmik misiliinissamut piukkunnaateqassaguit suliffimmi misiliinerup nalaani ilinniarfimmi qaffasinnerusumi ilinniagaqartutut nalunaarsorsimassaatit.

 

Suliffimmik misiliinermi akissarsiaqartitsisoqanngilaq kisianni suliffimmik misiliisuuninni najukkami aningaasartuutinik (soorlu inigisamut akiliutit) qaammammut 4.000 kr. tikillugit inuuniarnermi aningaasartuutit ilaat akilerneqarnissaannut matussutissanut utertitsivigineqartassaatit.

 

Nunanut Allanut Ministeeriaqarfiup isumannaallisaanermut atatillugu misiliilluni sulilersussaq akuerippagu aatsaat sulilertoqarsinnaavoq.

 

Tunngavittut misiliilluni sulisussap nammineerluni inissarsiornissani akisussaaffigisussaavaa. Sinniisoqarfilli attavissarsiornermi, telefonit normuinik il.il. ikiuussinnaavoq.

Qinnuteqaateqarnissamut piffissaliussaq

15. marts 2018.

Qinnuteqaat nassiunneqassaaq uunga:

 

Qinnuteqaat naatsoq, CV, soraarummeersimanermut uppernarsaatit oqaaseqaatillu attuumassutillit allat ilanngullugit "Praktikantansøgning"-imik nalunaaqutserlugu uunga mailikkut nassiunneqassaaq: rejl@nanoq.gl. Qinnuteqaat uppernarsaatinik imalik PDF-inngoqquneqarpoq.

Paasissutissat allat

 

Paasissutissanik allanik piniaruit attavigiuk:

Aallartitaqarfimmi allatsi Rebecca Lynge, Tlf. + 1 202 797 5392, rejl@nanoq.gl

 

Aamma takuuk http://naalakkersuisut.gl/da/Naalakkersuisut/Groenlands-repraesentation-Washington

 

Qinnuteqartunit toqqaanerup nalunaarutigineqarnissaa naatsorsuutigineqarpoq 2018-imi martsip naanerata missaani pissasoq.