Kalaallit Nunaata Washington, D.C.-mi Sinniisoqarfia

Washington, D.C.-mi Kalaallit Nunaata Sinniisoqarfia 2014-imi pilersinneqarpoq kiisalu pisortatigoortumik septemberip 24-ani 2014-imi ammaanersiorneqarluni qallunaat aallartitaqarfiata illutaani aamma inissisimaffeqartoq.

Sinniisoqarfik maannakkut naalakkersuisumik inuttaqartinneqarpoq kingusinnerusukkullu aamma aallartitaqarfimmi allatsimik ilaneqassalluni, tassani allattaasussamik ilinniartoqarlunilu. Naatsorsuutigineqarpoq, sulisut ilaneqarnissaat 2015-ip ingerlanerani piumaartut.

Kalaallit sinniisuutitassaata aapperneqarnera 2013-imi inatsisartut ukiakkut katersuunneranni aningaasanut inatsisissap isumaqatiginninniutigineqarnerani aalajangiunneqarpoq, aammalu Namminersorlutik Oqartussat Kalaallit Nunaata imminut nammassinnaasumik aningaasarsiornissaanik qularnaarinninniarluni sulissuteqarneranut pingaarutilimmik alloriarnertut aamma isigineqassalluni.

Siunertaavoq kalaallit sinniisuutitaata Canadamut attaveqaqatigiinnissamut piginnaatinneqarnissaa, taamaalilluni USA-misulli kalaallit-canadimiullu assigiinngitsutigut attaveqatigiittarnerat Naalakkersuisunit pingaartinneqartoq, nukittorsaavigineqassalluni.

Washington, D.C.-mi Kalaallit Nunaata Sinniisoqarfia Kalaallit Nunaata aamma USA-p nunat tamalaat akornanni suleqateqarneq pillugu suleqatigiissutai nukittorsaaviginiarlugit assigiinngitsutigut sulissuteqarpoq: Politikkikkut, aningaasaqarnikkut, niuernikkut, ilinniartitaanikkut, ilisimatusarnikkut kulturikkullu tunngasutigut.